Budapeştin ABŞ Konqresi qarşısında günahı nədir?
Budapeşt, 17 aprel, AZƏRTAC
Macar kütləvi informasiya vasitələri ABŞ Konqresində Macarıstanın indiki Baş naziri Viktor Orbanın siyasi tərəfdaşlarına qarşı sanksiyalar layihəsinin işlənib hazırlanması haqqında yazır.
AZƏRTAC “Budapest Business Journal” nəşrinə istinadla xəbər verir ki, siyahıya “Fides” hakim partiyası ilə əlaqədar olan şəxslər, eləcə də keçmiş və indiki məmurlar daxil ola bilər.
Məhdudiyyətlərin keçən ildən işlənib hazırlandığı bildirilir. Onların müəllifləri respublikaçılar və demokratlardan ibarət qrupdur (ABŞ-da belə qanun layihələri adətən “baypartizan” adlandırılır). Layihənin artıq mayda Konqresin hər iki palatasına təqdim olunması gözlənilir. Bir çoxları tərəfindən sənədin qəbul olunması şansı yüksək qiymətləndirilir.
Orbanın Avropa ölkələri tərəfindən Ukraynanın saxlanmasına on milyardlarla dollar xərclənməsi və bunun nəticəsində Avropa iqtisadiyyatının zərər çəkməsi barədə açıqlamaları Amerika qanunvericilərinin qəzəbinə səbəb olub. “Biz Ukrayna pensiyaları, hesablarını ödəyirik, biz dövlət idarələrini, səhiyyəni, təhsili saxlayırıq”, — deyə Orban qeyd edirdi.
Görünür ki, bu dəlillər Orbana və onun ətrafına qarşı məhdudlaşdırıcı tədbirlər tətbiq etmək üçün Amerika konqresmenlərinə kifayət qədər “kəskin” və “əsassız” gəlib.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
