BÜLƏND QORXMAZ “BAKI” FUTBOL KLUBUNUN YENİ BAŞ MƏŞQÇİSİDİR
Bakı, 29 sentyabr (AZƏRTAC). Türkiyəli mütəxəssis Bülənd Qorxmaz “Bakı” futbol klubunun yeni baş məşqçisidir. Sentyabrın 29-da onunla bir il müddətinə müqavilə imzalanmışdır. Əgər bu bir ildə komanda uğur qazanarsa, onda müqavilənin müddəti uzadılacaqdır. Müqavilə “Bakı” klubunun baş meneceri Zeynal Məmmədovun, vitse-prezident Tunc Əfşarın və icraçı direktor Yaşar Seyidovun iştirakı ilə imzalanmışdır.
Zeynal Məmmədov ümidvar olduğunu bildirmişdir ki, Bülənd Qorxmazın rəhbərliyi altında “Bakı” futbol klubu yeni nailiyyətlər əldə edəcəkdir.
Yeni baş məşqçi bildirmişdir ki, qardaş ölkədə işləyəcəyinə görə çox sevinir. Bülənd Qorxmaz komanda və oyunçular barədə geniş məlumat almaq məqsədilə “Bakı” klubunun keçmiş baş məşqçisi Cokiç Hacıyevski ilə görüşəcəyini vəd etmişdir. O demişdir: “Mənim bu komandaya dair böyük planlarım hələlik yoxdur. Lakin fikirləşirəm ki, futbolçularla birlikdə hər şeyə nail ola biləcəyik. Əgər komanda üzvləri futbolçuların hazırlanması üsuluma riayət etsələr, nəticə əldə olunacaqdır. Mən buna əminəm”.
Bölmənin digər xəbərləri
