Cari ildə Şimali Aral dənizinə təqribən bir milyard kubmetr su axıdılacaq
Astana, 7 aprel, AZƏRTAC
Qazaxıstan 2025-ci ilin suvarma mövsümündə Sırdərya çayından təxminən 3,7 milyard kubmetr su alacaq.
AZƏRTAC bu barədə Qazaxıstan Respublikasının Su Təsərrüfatı və Suvarma Nazirliyinin mətbuat xidmətinə istinadla xəbər verir.
Su təchizatının bu həcmi su təsərrüfatı və irriqasiya naziri Nurjan Nurjigitov ilə Tacikistan, Türkmənistan və Özbəkistan nümayəndələri arasında əldə olunan danışıqlar çərçivəsində razılaşdırılıb.
Danışıqlar Mərkəzi Asiyanın Su Təsərrüfatı üzrə Dövlətlərarası Əlaqələndirmə Komissiyasının Səmərqənddə keçirilən 89-cu iclası çərçivəsində baş tutub.
Razılaşmalara əsasən, Qazaxıstan suvarma dövründə dövlətlərarası “Dostıq” kanalı vasitəsilə 909 milyon kubmetr su alacaq. Bundan əlavə, 975 milyon kubmetr suyun Şimali Aral dənizinə axıdılması nəzərdə tutulur.
Xatırladaq ki, ötən ilin oktyabrından bu il aprelin 1-dək Özbəkistan Qazaxıstanı 12,6 milyard kubmetr su illə təchiz edib. Bu, əvvəllər nəzərdə tutulandan 1,7 milyard kubmetr çoxdur.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
