“Caspian European Club”un növbəti biznes-forumu
Bakı, 9 sentyabr, Flora Şükürova, AZƏRTAC
Sentyabrın 9-da “Avropa” hotelində Caspian European Club”un təşkilatçılığı, mədəniyyət və turizm nazirinin müavini Nazim Səmədovun sədrliyi ilə biznes-forum keçirilib.
AZƏRTAC xəbər verir ki, Azərbaycanda fəaliyyət göstərən diplomatik nümayəndələr, dövlət qurumları və özəl sektor nümayəndələrinin qatıldığı forumda turizmin inkişaf perspektivləri, dünya iqtisadi böhranının Azərbaycanın turizm sahəsinə təsiri məsələləri, eləcə də “Caspian European Club” çərçivəsində dövlət strukturlarının biznes nümayəndələri ilə əməkdaşlığının genişləndirilməsinin perspektivləri müzakirə olunub.
Tədbirdə “Caspian European Club”un baş icraçı direktoru Telman Əliyev çıxış edərək biznes-forumun keçirilməsi haqqında ətraflı məlumat verib. Qeyd edib ki, biznes-forum çərçivəsində şirkətlər onları maraqlandıran suallara cavab tapmaq, ölkəmizdə turizmin inkişafı və gələcək perspektivləri ilə bağlı müzakirələr aparmaq imkanı əldə edəcəklər.
Mədəniyyət və turizm nazirinin müavini Nazim Səmədov çıxışı zamanı son illər ərzində qeyri-neft sektorunun və xüsusilə turizm sənayesinin inkişafı, turizm sənayesinin ölkə iqtisadiyyatının şaxələndirilməsində oynadığı rol, eləcə də turizm sahəsində həyata keçirilən islahatlar və onların müsbət nəticələri haqqında məlumat verib.
Son illərin turizm statistikası haqqında danışan N.Səmədov 2005-ci ildən bu günədək ölkəyə gələn xarici turistlərin sayının 1.1 milyondan 2.3 milyona, mehmanxanaların sayının 262-dən 535-ə, yerləşdirmə vasitələrində yerlərin sayının 22 mindən 35 minə, turizm müəssisələrinin sayının 197-dən 286-ya çatdığını, turizm sahəsinin ölkənin ümumidaxili məhsulundakı xüsusi çəkisinin isə 4.1 faizə çatdığını qeyd edib.
Azərbaycanda turizmin davamlı inkişafının özünü ölkənin beynəlxalq reytinqlərində də göstərdiyini qeyd edən nazir müavini, Dünya İqtisadi Forumunun (DİF) 2015-ci il üçün “Səyahət və Turizm Rəqabətliliyi Hesabatı”nda ölkəmizin 141 ölkə arasında İnsan resursları və əmək bazarı göstəricisinə görə 36-cı, Biznes mühiti göstəricisinə görə 65-ci, İnsan resursları və əmək bazarı göstəricisinə görə isə 36-cı yeri tutduğunu, bununla da bir sıra inkişaf etmiş Avropa ölkələrini də geridə qoymağa nail olduğumuzu bildirib.
Bununla yanaşı, N.Səmədov Nazirliyin turizm sahəsinin inkişafı naminə gördüyü işlər, mədəniyyət və turizm sahələrinin inkişafı ilə bağlı son illər qəbul edilmiş çoxsaylı fərman və sərəncamlar, ölkəmizdə keçirilən beynəlxalq səviyyəli tədbirlərin müsbət imicin formalaşmasında oynadığı rol, turizmin qanunvericilik bazası, turizm sahəsinə investisiyanın cəlb olunması mexanizmləri, ölkəmizin turizm potensialının xarici ölkələrdə təbliği və gələcək planlar haqqında geniş məlumat verib.
Daha sonra forum nazir müavini və turizm sektorunu təmsil edən özəl qurumların nümayəndələri arasında dialoq şəklində davam etdirilib.
Qeyd edək ki, “Caspian European Club” regional təşkilat olaraq, 2002-ci ildə Xəzər-Qara dəniz regionunda fəaliyyət göstərən iri neft-qaz şirkətlərinin dəstəyi ilə yaradılıb.
Bölmənin digər xəbərləri
