Cənub bölgəsində 20 Yanvar şəhidlərinin xatirəsi böyük ehtiramla anılıb
Astara, 20 yanvar, Bağır Əliyev, AZƏRTAC
Yanvarın 20-də ölkəmizin hər yerində olduğu kimi, cənub bölgəsində də 20 Yanvar şəhidlərinin xatirəsi böyük ehtiramla yad edilib.
AZƏRTAC xəbər verir ki, Astara şəhərindəki Şəhidlər xiyabanında keçirilən anım mərasimində rayon rəhbərliyi və ictimaiyyət nümayəndələri “Şəhidlər” abidə-kompleksinin önünə əklil və gül dəstələri düzüblər. Burada şəhidlərin ruhuna dualar oxunub.
Mərasimdə qeyd olunub ki, Azərbaycan xalqının tarixinə Qanlı Yanvar faciəsi kimi daxil olmuş 1990-cı ilin soyuq qış gecəsində imperiya ordusunun vəhşiliyi nəticəsində 147 nəfər qətlə yetirilib, 744 nəfər yaralanıb, 841 nəfər qanunsuz həbs edilib. Yaralananlar arasında 25 qadın və 20 uşaq vardı. Onlardan bəziləri ömürlük şikəst olub.
Diqqətə çatdırılıb ki, həmin müdhiş qış gecəsində sovet əsgərlərinin gülləsinə tuş gələnlərdən ikisi astaralı idi. Onlar rayonun Balaca Şahağac kənd sakini Əliyev Çingiz Mirzəhüseyn oğlu və Səlivə kənd sakini Əsgərov Novruz Faiq oğludur.
Mərasim iştirakçıları 20 Yanvar faciəsinin dəhşətlərini əks etdirən sərgi ilə tanış olublar.
Tədbir Yeni Azərbaycan Partiyası Astara rayon təşkilatında şair Mərasim Hacızadənin yenicə çapdan çıxmış Astara şəhidlərinə həsr olunmuş “Əbədiyyət yolçuları” kitabının təqdimatı ilə davam edib.
Astara şəhidlərinə həsr olunmuş kitabın hər bir şəhid ailəsinə təqdim olunması böyük minnətdarlıq hissi ilə qarşılanıb.
X X X
20 Yanvar faciəsinin 27-ci ildönümü Lənkəranda da ehtiramla qeyd olunub. Minlərlə rayon sakini şəhərin mərkəzində yerləşən Şəhidlər xiyabanına gələrək, 20 Yanvar şəhidlərinin xatirəsini yad ediblər.
AZƏRTAC xəbər verir ki, mərasimə qatılan rayon rəhbərliyi “Şəhidlər” abidə-kompleksinin önündə şəhid ailə üzvləri ilə görüşərək, onların qayğıları ilə maraqlanıb.
Tədbir iştirakçıları Lənkəran şəhərindəki Heydər Əliyev Mərkəzində 20 Yanvar hadisələrinə həsr edilmiş rəsm sərgisi ilə tanış olublar.
Yanvarın sonunadək davam edəcək sərgidə Mərkəzin nəzdində fəaliyyət göstərən rəssamlıq kursunun, Lənkəran Şəhər Uşaq Rəssamlıq Məktəbinin və Lənkəran Şəhər Uşaq Yaradıcılıq Mərkəzinin yetirmələrinin 40-a yaxın əl işi nümayiş etdirilir.
Mərasim iştirakçıları, həmçinin Nəcəf bəy Vəzirov adına Lənkəran Dövlət Dram Teatrında Əli Vəlioğlunun “Əsrlərin harayı” tamaşasına da baxıblar. Qədim Azərbaycan dövlətinin yaranması, yurd sevgisi, bu dövlətin daim azad və firavan şəraitdə bərqərar olmasından bəhs edən səhnə əsəri tamaşaçılar tərəfindən maraqla qarşılanıb.
X X X
Yanvarın 20-də Masallı şəhərindəki Qəhrəmanlar parkında 20 Yanvar şəhidlərinin xatirəsinə ucaldılmış abidə-kompleksin önündə anım mərasimi keçirilib.
AZƏRTAC xəbər verir ki, səhər saatlarından başlayaraq minlərlə rayon sakini 20 Yanvar şəhidlərinin xatirəsini böyük ehtiramla anıblar. Rayon rəhbərliyi və ictimaiyyət nümayəndələri 20 Yanvar şəhidlərinin abidəsi önünə əklillər, gül dəstələri düzərək şəhidlərin xatirəsinə ehtiramlarını bildiriblər. Şəhidlərin ruhuna dualar oxunub.
Mərasimdə Masallı Xalq Teatrının üzvlərinin və Masallı Dövlət Regional Kollecinin həvəskar aktyorlarının ifasında “Haray” adlı ədəbi-bədii kompozisiya nümayiş etdirilib.
X X X
Cəlilabad şəhərində 20 Yanvar faciəsinin 27-ci ildönümü ilə əlaqədar keçirilən mərasimdə şəhidlərin xatirəsi ehtiramla yad olunub.
AZƏRTAC xəbər verir ki, rayon rəhbərliyi və ictimaiyyət nümayəndələri Cəlilabad şəhərinin mərkəzindəki Şəhidlər xiyabanını ziyarət edərək, şəhid rəsmlərinin həkk olunduğu mərmər lövhələrin önünə tər qərənfillər düzüblər.
Tədbir 20 Yanvar faciəsinə həsr olunmuş ədəbi-bədii kompozisiya ilə davam edib. Mərasimdə çıxış edən rayon icra hakimiyyətinin başçısı Əziz Əzizov xalqımıza qarşı törədilən Qanlı Yanvar faciəsinin səbəbləri barədə danışıb. Qeyd olunub ki, ötən əsrin 80-ci illərinin sonu və 90-cı illərinin əvvəllərində dağılmaqda olan sovet imperiyası öz ömrünü uzatmaq, müstəqillik uğrunda mübarizəyə qalxmış xalqları bu mübarizədən çəkindirmək üçün qanlı qırğınlar törətməkdən belə çəkinməyib. Belə qanlı hadisələrdən biri 1990-cı il yanvarın 19-dan 20-nə keçən gecə Azərbaycan xalqına qarşı törədilib. Həmin vaxt müstəqillik arzusu ilə meydanlara çıxan əliyalın, günahsız insanlara qarşı sovet ordusu birləşmələri tərəfindən bəşəri cinayət törədilib.
Bildirilib ki, bu qanlı hadisəyə ilk olaraq münasibət bildirən ümummilli lider Heydər Əliyev yanvarın 21-də Azərbaycanın Moskvadakı nümayəndəliyinə gələrək, faciəni törədən sovet rəhbərliyini kəskin şəkildə tənqid edib.
Mərasimdə şəhidlərin ruhuna “Qurani-Kərim”dən ayələr oxunub, ehsan verilib.
Tədbirin sonunda 20 Yanvar, Qarabağ müharibəsi əlillərinə və şəhid ailələrinə maddi yardımlar edilib.
X X X
Yanvarın 20-də Lerik şəhərindəki “Şəhidlər” abidə-kompleksinin önündə 20 Yanvar faciəsinin 27-ci ildönümünə həsr olunmuş anım mərasimi keçirilib.
AZƏRTAC xəbər verir ki, rayon rəhbərliyi və ictimaiyyət nümayəndələri abidə önünə əklillər və gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad ediblər.
Mərasim Lerik Rayon Mədəniyyət Mərkəzinin bədii özfəaliyyət kollektivlərinin və şəhər 1 nömrəli texniki fənlər təmayüllü liseyin şagirdlərinin ifasında 20 Yanvar faciəsinə həsr olunmuş ədəbi-bədii kompozisiya ilə davam etdirilib.
Bölmənin digər xəbərləri
