Cənubi Koreya, ABŞ və Yaponiya KXDR-in təhdidlərinə qarşı əməkdaşlığı gücləndirəcək
Pekin, 9 dekabr, AZƏRTAC
Cənubi Koreya, ABŞ və Yaponiyanın milli təhlükəsizlik müşavirləri Seulda görüşərək, Koreya Xalq Demokratik Respublikasının (KXDR) təhdidlərinə qarşı üçtərəfli təhlükəsizlik əməkdaşlığını daha da gücləndirmək barədə razılığa gəliblər.
AZƏRTAC Cənubi Koreya mediasına istinadla xəbər verir ki, Ço Tae-yonq (Cənubi Koreya), Ceyk Sallivan (ABŞ) və Takeo Akiba (Yaponiya) KXDR-in nüvə-raket fəaliyyəti və kiber hücumları, habelə Pxenyanın hərbi kəşfiyyat peykini orbitə çıxarması ilə bağlı məsələləri ətraflı müzakirə ediblər.
Görüşdən sonra keçirilən mətbuat konfransında tərəflərin Şimali Koreyaya qarşı yeni sanksiyaların faydalı olacağına inandıqları bildirilib. Tərəflər Pxenyanın nüvə silahı fəaliyyətinin ləğvi məsələsinə sadiq qaldıqlarını və BMT Təhlükəsizlik Şurasının qətnamələrinə uyğun olaraq KXDR-in başqa ölkələrlə hərbi sahədə əməkdaşlığına qarşı olduqlarını bəyan ediblər.
Qeyd olunub ki, bu üç ölkə Şimali Koreyanın təhdidləri ilə əlaqədar beynəlxalq ictimaiyyətlə əməkdaşlığı da dərinləşdirmək istəyir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
