Cənubi Koreya hökuməti böhranla üz-üzə: kabinet üzvləri istefa verir
Cənubi Koreya hökuməti böhranla üz-üzə: kabinet üzvləri istefa verir
Pekin, 4 dekabr, AZƏRTAC
Cənubi Koreyada dekabrın 3-də gecə saatlarında elan edilən və təxminən 6 saat davam edən hərbi vəziyyətdən sonra ölkədə siyasi gərginlik yaranıb.
AZƏRTAC xəbər verir ki, Koreya tarixinin ən qısamüddətli hərbi vəziyyəti ölkəni böhranla üz-üzə qoyub. Artıq müdafiə naziri Kim Yonq-Hyunq istefa verdiyini açıqlayıb. “Fövqəladə hərbi vəziyyətin yaratdığı bütün iğtişaşlara görə məsuliyyəti öz üzərimə götürərək Prezidentə istefa vermək istəyimi bildirdim”, - deyə o müraciətində bildirib. Medianın məlumatına görə, hərbi vəziyyət elan olunmasını Prezidentə müdafiə naziri təklif edib və onu inandırıb. Elə bu səbəbdən də parlamentdə müdafiə nazirinin impiçmenti məsələsi gündəmə gətirilib. Nazir impiçmenti gözləmədən istefa verməyi üstün tutub.
Parlamentin Prezident Yun Sok Yolun hərbi vəziyyət barədə qərarının əleyhinə səs verməsindən və dövlət başçısının hərbi vəziyyəti ləğv etməsindən sonra onun 11 köməkçisi, o cümlədən aparat rəhbəri, milli təhlükəsizlik məsələləri üzrə müşaviri istefa vermək niyyətlərini bildiriblər. Bundan başqa, kabinetin bütün üzvləri, o cümlədən 18 nazir istefa təkliflərini səsləndirib.
Milli Assambleyada üstünlük təşkil edən müxalifət isə daha da irəli gedərək Prezident Yun Sok Yolun impiçmenti prosesinə başlayıb. Əsas müxalif qüvvə olan Demokratiya Partiyasının 191 deputatı və kiçik müxalifət partiyalarından olan 5 deputat Prezident Yun Sok Yolun impiçmenti üçün vəsatət qaldırıblar. Məsələnin dekabrın 4-də parlamentin plenar iclasına çıxarılması, dekabrın 5-də və ya 6-da səsvermənin keçirilməsi planlaşdırılır. Qanunlara görə impiçment məsələsi plenar iclasın gündəliyinə təklif olunandan 72 saat ərzində səsvermə keçirilməlidir. İmpiçmentin təsdiqi üçün 300 yerlik parlamentin ən azı üçdə ikisi (200 deputat) lehinə səs verməlidir.
Qeyd edək ki, Cənubi Koreya Prezidenti Yun Sok Yol müxalifəti qiyamın hazırlanmasına yönəlmiş antidövlət fəaliyyətində ittiham edərək dekabrın 3-də gecə saatlarında ölkədə fövqəladə hərbi vəziyyət elan edib. O, televiziya müraciətində hərbi vəziyyətin Şimali Koreya meyilli kommunist qüvvələrin aradan qaldırılmasına, konstitusiya quruluşunun qorunmasına yönəldiyini açıqlayıb. Bu qərar əsas müxalif qüvvə olan Demokratiya Partiyasının parlamentdə dövlət büdcəsinin azaldılmasını tələb edən qanun layihəsini irəli sürməsindən, habelə dövlət auditoruna və baş prokurora impiçment üçün vəsatət qaldırmasından sonra qəbul edilib. Hərbi vəziyyət rejimində ölkədə bütün siyasi fəaliyyətin qadağan olunmasına, parlamentə giriş-çıxışın bağlanmasına baxmayaraq, 190 deputat Milli Assambleyaya toplaşaraq gizli səsvermədə Prezidentin hərbi vəziyyət qərarının əleyhinə səs veriblər. Dövlət başçısının hərbi münaqişə və fövqəladə vəziyyətlərdə parlamenti buraxmaq səlahiyyətinin olmasına baxmayaraq, Prezident Yun Sok Yol kabinetin iclasını keçirib və hərbi vəziyyətin aradan qaldırılması barədə razılıq əldə olunub. Dövlət başçısı dekabrın 4-də yerli vaxtla səhər saat 4:30-da hərbi vəziyyətin ləğv olunduğunu elan edib. Hərbi vəziyyətlə əlaqədar küçələrə çıxarılmış ordu geri çəkilib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
