Çexiya millisinin baş məşqçisi: Qrupdan çıxa bilməsək də, sabahkı oyunda qalib gəlməyə çalışacağıq
Bakı, 4 oktyabr AZƏRTAC
Düşünürəm ki, komandanı oyuna yaxşı hazırlamışam. Azərbaycan milli komandası ilə sabahkı oyunda qalib gəlməyə çalışacağıq. Əsas diqqətimizi oyunun ikinci hissəsinə yönəldəcəyik.
AZƏRTAC xəbər verir ki, bu sözləri futbol üzrə Çexiya milli komandasının baş məşqçisi Karel Yarolim oyundan əvvəl təşkil olunan mətbuat konfransında deyib.
Baş məşqçi bildirib: “Həqiqət budur ki, hazırda 9 xalımız var. Daha çox xal toplamağa çalışacağıq. Sabah oyunda komandanın heyətində ciddi dəyişiklik olmayacaq. Azərbaycan milli komandasının oyuna tam hazır olduğunu bilirik. Komandanın heyətində güclü futbolçular var”.
Çexiya millisinin üzvü Marek Suxi isə oyunla bağlı fikirlərini bölüşərkən deyib: “Sabah əsas məqsədimiz qalib gəlməkdir. Azərbaycan komandası haqqında məlumatlarımız müsbətdir. Dünya çempionatında iştirak edə bilməsək də, bunda sonra keçirəcəyimiz oyunlarda maksimum nəticə göstərməyə cəhd edəcəyik. İki tərəfin də qrupdan çıxmaq şansı olmasa da, biz bu oyuna tam güclə hazırlaşmışıq”.
Mətbuat konfransından sonra Çexiya millisi oyundan əvvəl sonuncu məşqini keçirib.
Bölmənin digər xəbərləri
