Çinli tələbə: BDU-nun çoxmədəniyyətli mühiti elmi inkişafıma töhfə verir – MÜSAHİBƏ
Bakı, 12 fevral, AZƏRTAC
Bakı Dövlət Universitetinin (BDU) Sosial elmlər və psixologiya fakültəsində idarəetmənin sosiologiyası ixtisaslaşması üzrə magistratura təhsili alan Vang Jiaqi həm də Çinin Sun Ya-Tsen Universitetinin tələbəsidir. O, BDU ilə Pekin Xarici Dillər Universiteti arasında imzalanmış anlaşma memorandumu çərçivəsində, BDU-nun 2021–2030-cu illəri əhatə edən “Strateji İnkişaf Planı”nın beynəlxalq mobillik proqramları üzrə Azərbaycanda təhsil alır. Azərbaycan cəmiyyətinin inkişafı, enerji sahəsində ictimai proseslər, eləcə də tələbə həyatı ilə bağlı təəssüratlarını bölüşən Vang Jiaqi elmi maraqları və gələcək akademik planları barədə danışıb. AZƏRTAC müsahibəni təqdim edir.
- Tədqiqat mövzun Azərbaycan cəmiyyətinin inkişafı ilə bağlıdır. Bu tədqiqatı məhz Azərbaycanda aparmaq sənə nə qazandırır?
- Azərbaycan Asiya ilə Avropa arasında çox mühüm mövqeyə malikdir və ölkənizin neft sənayesində qədim tarixi var. Son dövrlərdə Çində olduğu kimi, ölkənizdə də yaşıl enerji sahələri inkişaf edir. Mənim təhsil və tədqiqat sahəm də məhz enerji sahəsində gələcək inkişaf mövzusuna əsaslanır. Azərbaycanın iqtisadiyyatı güclüdür və insanların yaşayış səviyyəsi qonşu ölkələrlə müqayisədə daha yaxşıdır. Hesab edirəm ki, Azərbaycanın mövqeyi daha da möhkəmlənəcək. Tədqiqatı birbaşa öz məkanında aparmaq isə mənim üçün daha əlverişli mühit yaradır.
- İki ölkə arasındakı sosioloji məsələlərə nəzər yetirəndə hansı fərqləri müşahidə edirsən?
- Çin və Azərbaycan sosiologiyası arasındakı fərqlər barədə danışmaq çətindir. Çünki Çin çox böyük ölkədir və sosioloji vəziyyətin də kifayət qədər geniş aspektləri mövcuddur. Orada bu sahədə təhsil alan dostlarım, eyni zamanda, mənim kimi başqa ölkələri araşdıran tədqiqatçılar da var. Sosiologiyada əsas məqsəd təkcə ölkəni tanımaq deyil, cəmiyyətin problemlərini araşdırmaq və onların həlli yollarını tapmaqdır. Bu baxımdan həm öz ölkəni, həm də digər ölkələri öyrənmək vacibdir. Azərbaycanla Çin arasında sosioloji tədqiqatların aparılması üsulları arasında ciddi fərqlər olduğunu düşünmürəm. Hər iki ölkədə müqayisələr aparılır, ictimai sorğular keçirilir və statistika təhlil edilir. Təkcə fərq cəmiyyətlərimizdədir.
- Ölkəmizi araşdırarkən nələrlə tanış oldun?
- Azərbaycan çox gözəl ölkədir. Bakıda olduğum müddətdə demək olar ki, hər gün yeni şeylərlə tanış oluram. Bu il Yeni ili ölkəmdən uzaqda qarşıladım. İnsanların soyuq havada bayram sevincinə yığışması, xoş ab-hava, bu mühitin bir parçası olmaq mənim üçün əvəzsiz xatirədir. Ölkənizin tarixi ənənələri və müasirliyi özündə birləşdirən, çox xoşladığım memarlıq üslubu var. Bakıda müasir binalar arasındakı tarixi tikililər sanki danışan tarixi günümüzə daşıyır.
- Gənc tədqiqatçı kimi universitetimiz sənə nələr qazandırıb?
- BDU Cənubi Qafqazın və Azərbaycanın ən nüfuzlu ali təhsil müəssisəsidir. Burada təhsil almaq mənə yalnız akademik bilik deyil, elmi düşüncə tərzi qazandırıb. Çində olarkən Azərbaycan haqqında məlumatı əsasən media, internet və kitablar vasitəsilə alırdım, lakin bu biliklər daha çox nəzəri xarakter daşıyırdı. BDU-da isə araşdırmaları birbaşa yerində aparmaq, cəmiyyətlə ünsiyyətdə olmaq və real müşahidələr əsasında elmi nəticələr çıxarmaq imkanı əldə etdim. Universitetin zəngin kitabxanasına çıxışım oldu, Çində əldə edə bilmədiyim elmi mənbələri burada oxudum. BDU-nun çoxmədəniyyətli mühiti, müxtəlif ölkələrdən olan tələbə və tədqiqatçılarla ünsiyyət elmi inkişafıma töhfə verdi.
- BDU-da tələbə həyatın necədir?
- Azərbaycanda tanıdığım insanların hamısı mənimlə çox mehriban və səmimi davranır. Bir dəfə yolda tanımadığım bir insan mənə yaxınlaşıb köməyə ehtiyacım olub-olmadığını soruşdu. Bu cür kiçik, amma səmimi davranışlar göstərir ki, Azərbaycanda insanlar çox diqqətli və qonaqpərvərdilər. BDU-da qazandığım dostlarım məni tez-tez tədbirlərə dəvət edirlər. Azərbaycan-Çin münasibətləri inkişaf etdikcə, Çin dilini öyrənmək istəyənlərin sayı da artır.
Hazırda tələbə yataqxanasında qalıram. Burada müxtəlif ölkələrdən olan tələbələrlə birgə yaşamaq mənim üçün çox maraqlıdır. Fərqli mədəniyyətlərin bir araya gəlməsi Azərbaycanın beynəlxalq ölkə olduğunu göstərir, xarici tələbələrin BDU-da təhsil almalarına marağını artırır.
- Gələcək karyeranı necə təsəvvür edirsən?
- Məqsədim Azərbaycanı Çin ictimaiyyətinə daha yaxından tanıtmaqdır. Bunun üçünsə təkcə magistr təhsili kifayət etmir. Buna görə də akademik karyeramı davam etdirməyi planlaşdırıram. Çinə qayıtdıqdan sonra Azərbaycanla bağlı tədqiqatlar, elmi məqalələr üzərində işləmək, xüsusilə Azərbaycanın digər ölkələrlə münasibətlərini araşdırmaq istərdim.
Bölmənin digər xəbərləri
