Çirklənmiş torpaqların təmizlənməsi istiqamətində ekologiya idarəsinin rolu böyükdür
Bakı, 21 fevral (AZƏRTAC). Azərbaycan Respublikası Ekologiya və Təbii Sərvətlər Nazirliyi və Almaniyanın Ətraf Mühit, Təbiətin Mühafizəsi və Nüvə Təhlükəsizliyi üzrə Federal Nazirliyinin birgə təşkilatçılığı ilə “Torpaq necə mühafizə oluna bilər - Azərbaycan və Almaniyada torpaqların mühafizəsi və çirklənmiş ərazilərin idarə edilməsi hüquqi əsasları” mövzusunda seminar keçirilmişdir.
AZƏRTAC xəbər verir ki, seminarda Azərbaycan Respublikası Dövlət Neft Şirkətinin (ARDNŞ) ekologiya idarəsi 4 nümayəndə ilə təmsil olunmuşdur. Almaniya nümayəndəliyi ekologiya idarəsinin “Neftlə çirklənmiş torpaqların inventarlaşdırılması və GİS sistemində identifikasiyası” mövzusunda təqdimatı ilə tanış olmuşlar. ARDNŞ-in ekologiya idarəsinin əldə etdiyi ekoloji təcrübə, neftlə çirklənmiş torpaqların təmizlənməsində istifadə edilən üsullar və s. kimi məsələlər böyük maraq doğurmuşdur. Müzakirələr zamanı qonaqlara ekologiya idarəsinin ekoloji monitorinq işləri, maddi-texniki təchizat, müasir tələblərə cavab verən Kompleks Tədqiqatlar Laboratoriyası və Eko-Park haqqında geniş məlumat verilmişdir.
Çıxışlarda Azərbaycanda çirklənmiş ərazilərlə işin birgə aparılması haqqında, bu istiqamətdə görülən işlərin nəticələri, perspektivləri və birgə əməkdaşlıqların uzunömürlü olması vurğulanmışdır.
Bölmənin digər xəbərləri
