DAAD tələbələr üçün ekologiya mövzusunda tədris təşkil edib
Bakı, 14 iyun, Əziz Məmmədov, AZƏRTAC
İyunun 10-dan 16-dək Almaniya Akademik Mübadilə Xidməti (DAAD) Azərbaycan Dövlət Neft və Sənayesi Universitetinin (ADNSU) dəstəyi ilə bu təhsil müəssisəsində tədris təşkil edib. Tədrisin mövzusu “Ətraf mühitin mühafizəsi və könüllü sosial öhdəlik" olub. Həftə ərzində ADNSU-nun nəzdindəki “Yay məktəbi”ndə 20 (10 Azərbaycan və 10 gürcü) tələbə mədəniyyətlərarası əlaqələr, ətraf mühitin mühafizəsi, könüllü fəaliyyətin təşkili haqqında lazımi nəzəri və praktiki bilik əldə edəcək, eləcə də alman dili biliklərini möhkəmləndirəcək və genişləndirəcək.
AZƏRTAC-a eksklüziv müsahibəsində DAAD-ın Azərbaycandakı nümayəndəliyinin rəhbəri Stefani Düfo bildirib: “Bir həftəlik proqram çərçivəsində “Təbiətin dostları” Gənclər İctimai Birliyinin fəalları ilə görüşlər, habelə Qəbələ və Bakıdakı “Golden Horse Therapy”yə ekskursiyalar təşkil edilib. Seminarlar və gəzintilərlə yanaşı, iyunun 14-də tələbələr ADNSU-da təşkil olunmuş “Ətraf mühitin mühafizəsi və gündəlik öhdəliklər” mövzusunda təqdimatda çıxış ediblər. Bu tədbirdə onlar ətraf mühitin mühafizəsi üzrə gündəlik işin qurulmasını və ətraf mühitə ziyan vuran vərdişlərdən qurtulmanı nümayiş etdiriblər”.
S.Düfo DAAD-ın tarixi və Azərbaycandakı fəaliyyəti haqqında danışıb. O deyib: “1925-ci ildə yaradılan Almaniya Akademik Mübadilə Xidməti tələbə və müəllim mübadiləsi üçün dünyanın ən böyük beynəlxalq təqaüd təşkilatıdır. DAAD xarici universitetlərlə akademik əlaqələrin inkişafına yardım göstərir və xarici tələbələr, məzunlar, aspirantlar, gənc alimlər və universitet professorları üçün təhsil və tədqiqat təqaüdü verir. DAAD 20 ildən çoxdur ki, Azərbaycanda fəaliyyət göstərir. Bu dövrdə Almaniyada azərbaycanlı tələbələrin qrup səyahətləri maliyyələşdirilib, Azərbaycanda DAAD xətti ilə təqaüdlərin ayrılması, eləcə də dil kursları təşkil edilib. Almaniya Akademik Mübadilə Xidməti Azərbaycan universitetləri ilə sıx əməkdaşlıq edir. Xüsusilə Bakı Dövlət Universiteti (BDU) ilə əməkdaşlığı qeyd etmək istəyirəm. Belə ki, 2015-ci ildə “Alman dili dərsində poetik yazı” beş günlük ixtisaslaşdırılmış kurs tamamlanıb. BDU-nun almanşünas müəllimləri ilə yanaşı, digər universitetlərin əməkdaşları iştirak ediblər. Kursun sonunda iştirakçılara sertifikatlar verilib. Bundan başqa, ötən il BDU-da “ikili diplom” alan “Avropa hüququ magistri Proqramı” məzunlarının təltif olunmasına həsr edilən tədbir keçirilib. Bu proqram BDU və Almaniyanın Vürtsburq Universiteti arasında imzalanmış memorandum əsasında həyata keçirilib. Memoranduma əsasən, BDU tələbələri üçün intensiv alman dili kursları və Almaniyada təcrübə keçmə, Vürtsburq Universitetinin professorlarının isə BDU-da mühazirələri təşkil edilir. DAAD bu layihənin maliyyə dəstəyini təmin edir”.
Bölmənin digər xəbərləri
