DANİMARKADA XOCALI FACİƏSİNƏ HƏSR OLUNMUŞ KONFRANS KEÇİRİLMİŞDİR
Bakı, 25 fevral (AZƏRTAC). Danimarkanın Herlev şəhərində “Vətən” Cəmiyyətinin təşəbbüsü ilə Xocalı soyqırımının 17-ci ildönümünə həsr olunmuş konfrans keçirilmişdir.
Müxtəlif xalqların diaspor təşkilatlarının nümayəndələrinin də iştirak etdiyi konfransda soyqırımı qurbanlarının xatirəsi birdəqiqəlik sükutla yad edilmişdir. Xocalı qətliamı barədə geniş məlumat verən “Vətən” Cəmiyyətinin sədri Səfər Sadiqi ermənilərin tarix boyu xalqımıza qarşı terror və soyqırımı aktları, Dağlıq Qarabağ münaqişəsi barədə ətraflı məlumat vermişdir. Cəmiyyətin üzvləri Güllü Cahangirova, Təranə Hüseynova, Şahin Atayev “Gülüstan Müqaviləsi” imzalandıqdan sonra Azərbaycan xalqının başına gələn müsibətlərdən söz açmışlar. Herlevdəki çeçen icmasının rəhbəri İlyas Musayev dünya mətbuatının Xocalı faciəsi barədə yazdıqlarından sitatlar gətirmiş, Gürcü cəmiyyətinin sədri Rusudan Qiorqberidze isə gürcü xalqının hər bir məsələdə Azərbaycanla həmfikir olduğunu bildirmişlər.
Sonra Xocalı soyqırımından bəhs edən sənədli film nümayiş etdirilmiş, bir neçə dildə çap edilmiş bröşürlər qonaqlara paylanmışdır.
Bölmənin digər xəbərləri
