DAŞKƏNDDƏ BİRGƏ ƏMƏKDAŞLIQ KOMİSSİYASININ İCLASI BAŞA ÇATMIŞDIR
Komissiyanın Özbəkistan tərəfdən həmsədri, Baş nazirin müavini Rüstəm Yunusov Azərbaycan nümayəndə heyətini salamlamış və qeyd etmişdir ki, belə görüşlərin intensiv keçirilməsi ümumi işin xeyrinədir.
Abbas Abbasov öz çıxışında demişdir: Azərbaycanla Özbəkistan arasında əlaqələr getdikcə inkişaf edir. Bu yaxınlarda, martın 23-24-də Azərbaycan Prezidenti İlham Əliyevin Özbəkistana rəsmi səfəri nəzərdə tutulur. Əminəm ki, bu səfər əlaqələrin daha da genişlənməsində və möhkəmlənməsində mühüm rol oynayacaq. Səfər müddətində Azərbaycanla Özbəkistan arasında müxtəlif sahələri əhatə edən yeddi sənədin imzalanacağı gözlənilir.
Hökumətlərarası komissiyanın ötən il Daşkənddə keçirilmiş iclasının qərarlarının yerinə yetirilməsi, Özbəkistan Respublikası və Azərbaycan Respublikası hökumətləri arasında 2001-2010-cu illər üçün iqtisadi əməkdaşlıq proqramının həyata keçirilməsi və iki ölkə arasında gələcək ticarət-iqtisadi əməkdaşlığın inkişafı, TRASEKA dəhlizindən daha səmərəli istifadə edilməsi, həmçinin elmi, mədəni, humanitar sahədə əməkdaşlığın dərinləşdirilməsi, ölkələr arasında hüquqi bazanın genişləndirilməsi və bir sıra digər məsələlər müzakirə olunmuşdur.
Qeyd edilmişdir ki, 2003-cü ildə Azərbaycanla Özbəkistan arasında xarici ticarət dövriyyəsi 9,51 milyon dollar olmuşdur. Bu da mövcud imkanlardan çox azdır. Ötən il Azərbaycandan Özbəkistana kimya məhsulları və plastmas, müxtəlif avadanlıqlar, Özbəkistandan Azərbaycana isə ərzaq və kimya məhsulları, maşın və ehtiyat hissələri göndərilmişdir.
Özbəkistanda üç Azərbaycan-Özbəkistan birgə müəssisəsi fəaliyyət göstərir. Azərbaycanda isə “Özbəkistan” ticarət evi yaradılmışdır.
Danışıqların yekunu ilə bağlı “Azərbaycan və Özbəkistan arasında əməkdaşlıq üzrə hökumətlərarası komissiyanın yeddinci iclasının protokolu” imzalanmışdır. Sənədi Azərbaycan Baş nazirinin birinci müavini Abbas Abbasov, Özbəkistan tərəfdən Baş nazirin müavini Rüstəm Yunusov imzalamışlar.
İmzalanma mərasimində Azərbaycanın Özbəkistandakı səfiri Aydın Əzimbəyov, Özbəkistanın Azərbaycandakı səfiri Əbdülqafur Əbdürrəhmanov iştirak etmişlər.
Komissiyanın növbəti iclası gələn il Bakıda keçiriləcək.
Bölmənin digər xəbərləri
