DAŞKƏNDDƏ XOCALI FACİƏSİNİN İLDÖNÜMÜ İLƏ ƏLAQƏDAR ANMA MƏRASİMİ KEÇİRİLMİŞDİR
Daşkənd, 27 fevral (AZƏRTAC). Daşkənddəki Azərbaycan diasporunun üzvləri Xocalı faciəsinin 17-ci ildönümü ilə əlaqədar anma mərasimi keçirmişlər. Tədbirdə paytaxtda yaşayan 400-ə yaxın soydaşımız, səfirliyimizin əməkdaşları, jurnalistlər iştirak etmişlər.
Şəhidlərin xatirəsi bir dəqiqəlik sükutla yad edilmiş, onların ruhuna dua oxunmuşdur.
Diasporun rəhbəri Akif Ağatalıbov bildirmişdir ki, Xocalı faciəsi ötən əsrin ən böyük faciələrindən biri kimi yaddaşlarda qalacaq və ermənilərin törətdiyi soyqırımlarını bizim unutmağa haqqımız yoxdur.
Azərbaycanın Özbəkistandakı səfirliyinin ikinci katibi İlqar İbrahimov Xocalı faciəsinin tarixi, Azərbaycan-Ermənistan, Dağlıq Qarabağ münaqişəsinin sülh yolu ilə həllində Azərbaycanın ədalətli mövqeyi barədə geniş məlumat vermişdir.
Bildirilmişdir ki, erməni quldur dəstələri keçmiş SSRİ-nin 366-cı motoatıcı alayının əsgərləri ilə birgə Xocalıda görünməmiş vəhşiliklər törətdi, 613 nəfər - qocalar, qadınlar, uşaqlar, südəmər körpələr vəhşicəsinə güllələndi, süngüdən keçirildi və insanlığa sığmayan işgəncələrlə öldürüldü.
Digər natiqlər də ermənilərin və onların havadarlarının vəhşiliklərini kəskin ittiham etmişlər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
