Daxili İşlər Nazirliyi vətəndaşları xüsusi karantin rejimi qaydalarına ciddi əməl etməyə çağırır
Bakı, 10 dekabr, AZƏRTAC
Daxili İşlər Nazirliyi (DİN) xüsusi karantin rejimi qaydalarına ciddi əməl olunması ilə bağlı vətəndaşlara müraciət edib.
DİN-in mətbuat xidmətindən AZƏRTAC-a bildiriblər ki, müraciətdə virusa yoluxan şəxslərin ev şəraitində müalicə təyin olunmasına baxmayaraq, xüsusi karantin rejimi qaydalarını pozaraq yaşayış yerlərini tərk etməsi hallarının müşahidə olunduğu vurğulanıb.
Qeyd olunub ki, dekabrın 9-da polis əməkdaşları və Daxili Qoşunların hərbi qulluqçuları tərəfindən respublikamızda əhalinin intensiv hərəkət etdiyi, ictimai yerlərdə 25 nəfər aktiv COVID-19 xəstəsi müəyyənləşdirilərək saxlanılıb. Görülən tədbirlərlə həmin şəxslər evə qaytarılıblar.
Onlardan 21 nəfər barəsində Cinayət Məcəlləsinin 139-1.1-ci (epidemiya əleyhinə rejimin, sanitariya-gigiyena və ya karantin rejimlərinin pozulması) maddəsi ilə cinayət işi başlanıb, istintaq araşdırmaları davam etdirilir.
DİN bir daha vətəndaşlarımızı xüsusi karantin rejiminin tələblərinə ciddi əməl etməyə çağırır.
Bölmənin digər xəbərləri
