İQTİSADİYYAT
Deputat: Düzgün iqtisadi siyasət ölkəmizi ancaq və ancaq tərəqqiyə doğru aparır
Bakı, 20 iyul, AZƏRTAC
Ulu öndər Heydər Əliyevin “İqtisadiyyatı güclü olan ölkə hər şeyə qadirdir” sözləri 44 günlük Vətən müharibəsində nail olduğumuz Qələbə ilə öz təsdiqini tapdı. Belə ki, ölkə iqtisadi cəhətdən müstəqil olanda, siyasi müstəqilliyə də qovuşmuş olur. Çünki iqtisadi asılılığı olan ölkələr heç vaxt müstəqil siyasət yürüdə bilməzlər. Prezident İlham Əliyevin rəhbərliyi ilə Azərbaycan iqtisadi və siyasi müstəqillik qazanmış azsaylı ölkələrdəndir. Bu gün pandemiyanın və müharibələrin dünya iqtisadiyyatında buraxdığı çatlar dərinləşdiyi təqdirdə Azərbaycan iqtisadiyyatı özünün dinamik inkişaf tempini qoruyub saxlayır. İlin altı ayının sosial iqtisadi göstəriciləri bir daha əminlik yaradır ki, düzgün iqtisadi siyasət ölkəni ancaq tərəqqiyə doğru aparır. Müsbət göstəriciləri rəqəmlərlə ifadə etsək görərik ki, iqtisadiyyat 6,2, qeyri-neft sektoru 9,6, sənaye istehsalı 2,1, qeyri-neft sənaye istehsalı 11,5, əhalinin gəlirləri 20, orta əməkhaqqı 14 faiz, pensiya isə 10 faizdən çox artıb. Düzdür, dünyanın ən güclü iqtisadiyyatları olan ölkələrdə inflyasiya ikirəqəmli səviyyəyə gəlib. Halbuki, həmin ölkələrdə inflyasiya il ərzində cəmi 1,5 faizə qədər olurdu. Azərbaycan da dünyanın bir parçasıdır. Odur ki, dünya iqtisadiyyatının məruz qaldığı qlobal inflyasiya tendensiyası ölkəmizin iqtisadiyyatına da təsir edib. Hökumətin apardığı antiinflyasiya tədbirləri sayəsində qlobal inflyasiyanın ölkəmizə təsirinin daha da artmasının qarşısı alınıb, milli valyutamızın məzənnəsi xarici valyutalar qarşısında güclənib. Təbii ki, milli valyutamızın rəqabətədavamlı olması həm əhalinin sosial rifahının qorunub saxlanmasına, həm də ölkəmizdə investisiya mühitinin cəlbediciliyinin artmasına töhfə verir.
Bunu AZƏRTAC-a açıqlamasında Milli Məclisin deputatı Azər Badamov söyləyib.
Xarici dövlət borcunun azaldılması istiqamətində dövlətimizin başçısının ötən ilin müvafiq dövründə verdiyi tapşırıqların yüksək səviyyədə icra olunduğunu bildirən deputat xarici dövlət borcunun ümumi daxili məhsulun 16,6 faizindən endirilərək 10 faizdən bir az yuxarı səviyyədə qərarlaşmasını Azərbaycan iqtisadiyyatının güclənməsinin göstəricisi kimi qiymətləndirib. O deyib: “Ölkəmizdə aparılan iqtisadiyyatın şəffaflaşdırılması siyasəti öz müsbət nəticələrini göstərməkdədir. Belə ki, kölgə iqtisadiyyatının aradan qaldırılması istiqamətində görülən tədbirlər sahibkarlıq mühitinin daha da şəffaflaşmasına yol açıb. Sahibkarlar vergi orqanlarından gizlənərək fəaliyyət göstərmək mərhələsini arxada qoyublar. Onlar vergi orqanları ilə əməkdaşlıq edərək dövlətə vergi ödəməklə fəaliyyət göstərirlər. Bu o deməkdir ki, ölkəmizdə kölgə iqtisadiyyatının payı azalmağa doğru gedir. Altı ay ərzində vergi xidməti orqanları tərəfindən proqnozdan əlavə 2 milyard manat vəsaitin yığılması da bunun əyani göstəricisidir”.
A.Badamovun sözlərinə görə, ölkə iqtisadiyyatında dinamik inkişaf dövrünü yaşayan və iqtisadiyyatda payı artan sektorlardan biri də energetikadır. Bildirilib ki, Azərbaycan iqlimin dekarbonlaşdırılması və “yaşıl enerji”yə keçidlə əlaqədar qlobal çağırışlara qoşulan ilk ölkələrdəndir.
“710 meqavat gücündə bərpaolunan üç enerji stansiyasının qurulması istiqamətində işlər sürətlə davam etdirilir. Həm də Azərbaycanın bərpaolunan enerji potensialı çox yüksəkdir və dövlətimizin başçısının tapşırıqları ilə bu sahənin inkişafı əsas prioritetlərin sırasındadır. Belə ki, torpaqlarımızın işğaldan azad olunduğu 1,8 ay müddətində həmin ərazilərdə doqquz kiçik su elektrik stansiyasının inşası ya başa çatıb, ya da ilin sonunadək yekunlaşacaq. Yeni elektrik xətləri çəkilir. Dövlətimizin hədəfi isə daha çox təmiz elektrik enerjisi istehsal etməklə Avropanın enerji bazarına daxil olmaqdır. Bunun üçün ölkəmizdə kifayət qədər böyük potensialı mövcuddur. Bu gün Azərbaycan həm ölkə daxilində yeni elektrik istehsal güclərinin yaradılması istiqamətində sürətlə çalışır, həm də Avropa İttifaqı ölkələrinə elektrik enerjisinin çatdırılması üçün yeni xətlərin tikintisində iştirak edir. Belə ki, ölkəmiz Qara dənizin dibi ilə yeni magistral elektrik xəttinin tikintisi layihəsində iştirak etməklə yanaşı, Zəngəzur dəhlizinin açılması və həmin ərazidə yeni elektrik xətti marşrutunun tikintisi ətrafında qlobal əhəmiyyətli layihələrin ərsəyə gətirilməsinin təşəbbüskarıdır. Azərbaycan bu gün Avropa İttifaqı üçün etibarlı tərəfdaşdır. Ölkəmiz arasında enerji sahəsində əməkdaşlıq sazişinin imzalanması ilə bu əməkdaşlığın genişləndirilməsi üçün hüquqi baza formalaşacaq. Azərbaycan hökuməti ölkəmizin yerləşdiyi coğrafiyadan çox səmərəli istifadə etməklə iqtisadiyyatın güclənməsi istiqamətində böyük layihələr icra edir. Onu da qeyd etmək yerinə düşər ki, həmin layihələr və uğurlu beynəlxalq siyasət nəticəsində Azərbaycan dünyanın ən etibarlı, hörmətli və nüfuzlu ölkəsinə çevrilib”, - deyə A.Badamov fikirlərinə yekun vurub.