Deputat: Milli Qurtuluş Günü bizə keçmişi unutmadan gələcəyə daha inamla baxmaq imkanı verir
Bakı, 11 iyun, AZƏRTAC
Xalqımızın milli iradəsinin, birliyinin və dövlətçilik uğrunda mübarizəsinin rəmzi olan Milli Qurtuluş Günü müasir tariximizin ən şərəfli səhifələrindəndir. 1991-ci il oktyabrın 18-də müstəqilliyini bərpa edən xalqımız daxili siyasi çəkişmələr, ağır iqtisadi böhran və Ermənistanın işğalçılıq siyasəti ilə müşayiət olunan çətin bir dövr yaşayırdı. Müdrik Azərbaycan xalqı belə bir dövrdə xilas yolunu Ümummilli Lider Heydər Əliyevi hakimiyyətə dəvət etməkdə gördü. Ulu Öndərin Azərbaycanda hakimiyyətə qayıdışı müasir tariximizdə mühüm dönüş nöqtəsi oldu.
Bu fikirləri AZƏRTAC-a açıqlamasında Milli Məclisin deputatı Mircəlil Qasımlı vurğulayıb.
Həqiqi dövlət müstəqilliyini qoruyub saxlamağın onu qazanmaqdan qat-qat çətin olduğunu söyləyən deputat qeyd edib ki, 1991-1993-cü illər ərzində ölkəmizdə dövlət müstəqilliyimizə və suverenliyimzə təhdid yaradan bütün amillər mövcud idi. Ölkədə həyatın bütün sahələrində dərin böhran yaşanırdı. Ermənistanın işğalçılıq siyasəti, şəhər və kəndlərimizin ard-arda işğala məruz qalması, hakimiyyətdaxili siyasi çəkişmələr, orduda vahid komandanlığın olmaması, genişlənən qaçqın və köçkün problemləri vəziyyəti daha da ağırlaşdırırdı.
“Tarixə Milli Qurtuluş Günü kimi daxil olan 1993-cü ilin 15 iyununda Ulu Öndər Heydər Əliyev Azərbaycanda yenidən siyasi hakimiyyətə qayıdışı ilə ölkəmizi 1991-ci ildə bərpa olunmuş müstəqilliyini itirmək təhlükəsindən xilas etdi. Tarixi xilaskarlıq missiyasını uğurla həyata keçirən Ulu Öndərin siyasi təcrübəsi, müdrik və qətiyyətli qərarları və milli maraqlara əsaslanan siyasəti sayəsində ölkədə vətəndaş müharibəsinin qarşısı alındı, separatçılıq meyilləri neytrallaşdırıldı, nizami ordu quruculuğuna başlanıldı və ölkənin beynəlxalq aləmdə nüfuzu yüksəldi”, - deyə Mircəlil Qasımli vurğulayıb.
Deputat bildirib ki, Azərbaycanın uzunmüddətli iqtisadi inkişafının möhkəm təməlini qoyan Ümummilli Liderin təşəbbüsü və iştirakı ilə “Əsrin müqaviləsi”nin imzalanması ölkəmizin hərtərəfli inkişafına əsaslı zəmin yaratdı. Ümummilli Liderin müəyyənləşdirdiyi enerji strategiyası xalqımızın taleyində, Azərbaycanın davamlı və dayanıqlı inkişafında, beynəlxalq mövqelərinin formalaşmasında böyük rola malikdir. Ümummilli Liderin müdrik rəhbərliyi ilə dövlətçiliyin əsaslarının möhkəmləndirilməsi istiqamətində zəruri addımlar atıldı, hüquqi və demokratik islahatlar həyata keçirildi. Bu il qəbul olunmasının 30-cu ildönümünü qeyd etdiyimiz ilk Konstitusiyamız hazırlanaraq qəbul edildi. Beləliklə, Ümummilli Lider müstəqil Azərbaycanın sosial, siyasi, iqtisadi və mədəni həyatının bütün sahələrində hərtərəfli yüksəlişin möhkəm əsaslarını yaratdı. Ölkəmiz müstəqil dövlət kimi davamlı inkişaf yoluna qədəm qoydu.
Milli Qurtuluş Günü hər bir azərbaycanlı üçün böyük əhəmiyyətə malik hadisədir. Bu tarixi gün dövlətinə, xalqına və liderinə olan etimadın, milli həmrəyliyin və gələcəyə olan ümidin təntənəsidir. 15 iyun tarixi bizə keçmişi unutmadan gələcəyə daha inamla baxmaq imkanı verir.
Bölmənin digər xəbərləri
