Dövlət İdarəçilik Akademiyasında Dövlət Suverenliyi Günü qeyd olunub
Bakı, 18 sentyabr, AZƏRTAC
Sentyabrın 18-də Azərbaycan Respublikasının Prezidenti yanında Dövlət İdarəçilik Akademiyasının (DİA) Heydər Əliyev Mərkəzində Dövlət Suverenliyi Gününə həsr olunmuş tədbir keçirilib.
DİA-dan AZƏRTAC-a bildirilib ki, tədbir Azərbaycan Respublikasının müstəqilliyinin möhkəmləndirilməsi, dövlət suverenliyinin bərpası və qorunması sahəsində görülən işlərə və bu istiqamətdə əldə edilən uğurların təhlilinə həsr olunub.
Tədbiri açan Dövlət İdarəçilik Akademiyasının rektoru akademik Urxan Ələkbərov Azərbaycanın son 30 ildə keçdiyi inkişaf yoluna nəzər salaraq qeyd edib ki, bu illər ərzində ölkəmiz mühüm siyasi, iqtisadi və hərbi uğurlar əldə edib. Müstəqilliyin ilk illərində Azərbaycan dərin siyasi, iqtisadi və sosial böhranla, Ermənistanın hərbi təcavüzü və xalqımıza qarşı həyata keçirilən etnik təmizləmə siyasəti ilə üzləşmişdi. Xalqın təkidli tələbi ilə Ulu Öndər Heydər Əliyevin 1993-cü ildə hakimiyyətə qayıdışı Azərbaycanı parçalanmaq təhlükəsindən xilas etdi.
Urxan Ələkbərov çıxışında, həmçinin 2020-ci ilin 44 günlük Vətən müharibəsinin, eləcə də 2023-cü ilin sentyabrında keçirilmiş lokal xarakterli antiterror tədbirlərinin əhəmiyyətindən danışıb. O bildirib ki, bu tarixi qələbələr Prezident İlham Əliyevin həyata keçirdiyi məqsədyönlü və uzaqgörən dövlət idarəetməsi strategiyasının məntiqi nəticəsidir. Bu strategiyanın əsasını güclü ordu quruculuğu, milli həmrəyliyin möhkəmləndirilməsi və beynəlxalq müstəvidə prinsipial mövqe təşkil edib.
Akademik vurğulayıb ki, məhz bu uğurların nəticəsi olaraq, Prezident İlham Əliyev 2024-cü il sentyabrın 19-da “Azərbaycan Respublikasında Dövlət Suverenliyi Gününün təsis edilməsi haqqında” Sərəncam imzalayıb. Sərəncama əsasən, sentyabrın 20-si ölkəmizdə Dövlət Suverenliyi Günüdür.
Tədbirdə çıxış edənlər 44 günlük Vətən müharibəsinə aparan tarixi-siyasi prosesləri, 2023-cü ilin sentyabrında keçirilmiş lokal xarakterli antiterror tədbirlərinin hüquqi əsaslarını və beynəlxalq kontekstdə yaratdığı reallıqları ətraflı təhlil ediblər.
Milli Məclisin deputatı, professor Elman Nəsirov bildirib ki, Azərbaycan 1990-cı illərin əvvəllərində zəif və zəbt olunmuş bir dövlət statusundan bu gün regionun əsas siyasi və hərbi güc mərkəzinə çevrilib. O, ölkənin siyasi liderliyinin qətiyyətli addımlar ataraq suverenlik və ərazi bütövlüyü prinsipini dəqiq və ardıcıl şəkildə həyata keçirdiyini qeyd edib.
Dövlət İdarəçilik Akademiyasının Tarix kafedrasının professoru Havva Məmmədova çıxışında Azərbaycanın dövlətçilik tarixində müstəqilliyin bərpasının və qorunmasının ciddi sınaqlardan keçdiyini vurğulayıb. O, 2020-ci ildəki Zəfərimizə qədər olan dövrü təhlil edərək, bu uğurların təkcə hərbi sahədə deyil, həm də diplomatik və ideoloji sahədə aparılmış uzunmüddətli mübarizənin nəticəsi olduğunu diqqətə çatdırıb.
DİA-nın Beynəlxalq münasibətlər kafedrasının professoru və “Qarabağ İrsini Araşdırma Mərkəzi”nin rəhbəri Elçin Əhmədov çıxışında 2023-cü ilin sentyabrında lokal xarakterli antiterror tədbirlərinin beynəlxalq hüquqa tam uyğun şəkildə həyata keçirildiyini vurğulayıb. O bildirib ki, bu tədbirlər nəticəsində qondarma rejim özünü buraxdı, Azərbaycanın beynəlxalq birlik tərəfindən tanınan bütün əraziləri üzərində suverenlik tam təmin olundu və dövlətin nəzarət funksiyası tam bərpa edildi.
Tədbir iştirakçıları vurğulayıblar ki, sentyabrın 20-sinin Dövlət Suverenliyi Günü kimi qeyd olunması təkcə tarixi qələbəmizin rəsmiləşdirilməsi deyil, həm də gələcək nəsillərə milli ruhun, dövlətçilik ənənələrinin aşılanması baxımından böyük əhəmiyyət daşıyır.
Bölmənin digər xəbərləri
