Dövlət Neft Şirkətinin ekologiya idarəsində nəqliyyat vasitələrinin ekoloji müayinəsi aparılır
Bakı, 22 oktyabr (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsinin ekoloji ölçmə mərkəzi idarə və müəssisələrin balansında olan nəqliyyat vasitələrindən atmosferə atılan işlənmiş qazların miqdarının ölçülməsi işlərini davamlı olaraq yerinə yetirir.
AZƏRTAC xəbər verir ki, “Azneft” İstehsalat Birliyinin, geofizika və geologiya idarəsinin sifarişi ilə ekoloji ölçmə mərkəzinin əməkdaşları “Neft Daşları”nda istismar olunan nəqliyyat vasitələrini ekoloji müayinədən keçirmişlər.
Hazırda mərkəzin əməkdaşları “Neftqaztikinti” trestinin avtonəqliyyat idarəsinin və təhlükəsizlik idarəsinin nəqliyyat vasitələrini təkrar ekoloji müayinədən keçirirlər.
ARDNŞ-nin həyata keçirdiyi ekoloji proqramlar çərçivəsində mərkəz tərəfindən verilən tövsiyələrə uyğun olaraq ekoloji müayinədən keçirilən avtonəqliyyat vasitələrinin yanacaq sistemlərinin tənzimlənərək onların saz vəziyyətdə saxlanılması və nəqliyyat vasitələrindən atmosferə atılan zərərli qazların miqdarının minimuma endirilməsi istiqamətində müvafiq tədbirlər görülür.
Bölmənin digər xəbərləri
