Dövlət Neft Şirkətinin ekologiya idarəsində payız–qış mövsümünə hazırlıq işləri başa çatdırılmışdır
Bakı, 25 oktyabr (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsində payız-qış mövsümünə hazırlıq işləri başa çatdırılmışdır.
AZƏRTAC xəbər verir ki, mövsümə hazırlıqla bağlı əvvəlcədən tərtib edilmiş tədbirlər planına uyğun olaraq Qala qəsəbəsində yerləşən ekologiya parkın ərazisində quraşdırılmış qazanxana və istixananın istilik xətlərinə baxış keçirilmişdir. Qarşıya çıxan nasazlıqlar aradan qaldırılmış və istixananın istiliklə təmin olunması tam hazır vəziyyətə gətirilmişdir.
Balaxanı istehsalat sahəsində ərazini işıqlandırmaq üçün quraşdırılmış yerüstü işıq dayaqlarının kabellərində aşkar olunmuş nasazlıqlar aradan qaldırılmışdır. İstehsalat sahəsinin suya olan tələbatını ödəmək üçün yeni 50 millimetr su xətti çəkilmiş və su sayğacı quraşdırılmışdır.
İdarənin ekoloji monitorinq departamentində, kompleks tədqiqatlar laboratoriyasında quraşdırılmış istilik cihazları, istilik kondisionerləri, dam örtükləri yoxlanılmış və nöqsanlar yerindəcə aradan qaldırılmışdır.
Qaradağ rayonunda yerləşən tullantı mərkəzini elektrik enerjisi ilə təmin edən 6 kilovoltluq hava xətti baxış keçirilmiş, qəzalı elektrik xətləri və 160 kilovatlıq transformatorun qoruyucuları yenisi ilə əvəz olunmuşdur.
Bölmənin digər xəbərləri
