Döyüş meydanından yüzlərlə yaralını çıxaran qazımız – Aqşin Qurbanzadə
Zaqatala, 1 noyabr, Mustafa Dadaşov, AZƏRTAC
Vətən müharibəsində ilk gündən döyüşlərə atılan qəhrəman qazilərimizdən biri də Zaqatala rayonundan olan Aqşin Qurbanzadədir.
AZƏRTAC-ın bölgə müxbiri Qarabağ qazisi Aqşinlə görüşüb, onun döyüş yolu ilə maraqlanıb.
Aqşin Qurbanzadə 1999-cu ildə Zaqatala şəhərində anadan olub. Türkiyədə Qafqaz Universitetində təcili yardım həkimi ixtisası üzrə ali təhsil alıb. Təhsilini başa vurduqdan sonra Vətənə qayıdıb, 2019-cu ildə həqiqi hərbi xidmətə çağırılıb. Ağcabədi və Füzulidə hərbi xidmətdə olub. Ordudan tərxis olunmasına 3 gün qalmış, 2020-ci il sentyabrın 27-də müharibə başlayıb. Müharibənin ilk günündən döyüşlərə qatılıb, həyatını təhlükəyə ataraq yüzlərlə yaralını döyüş meydanından çıxarıb.
Aqşin həmin günləri belə xatırlayır: “Sentyabrın 27-si səhər saat 7-8 olardı. Əmr gəldi ki, müharibə başlayıb. İlk döyüşlər Füzuli istiqamətində idi. Taborumuz ehtiyat üçün olduğundan gözləmədə idik. Saat 8-in yarısında əmr gəldi və komandirimiz Anar Seyidov, mən və daha iki nəfər rabitəçi əsgər xüsusi tapşırıqla döyüşlərin getdiyi yerə yollandıq. Döyüşlər Füzuli istiqamətində gedirdi. İlk dəfə idi ki, əsl döyüşlərin şahidi olurdum. Düşmən minomyotlardan, toplardan atəş açırdı, mərmilərin partlayış səsindən qulaq tutulurdu. Əsas işim yaralıları döyüş ərazisindən çıxarmaq və onlara ilkin tibbi yardım göstərmək idi. Yaralıları təcili tibbi yardım maşını ilə Füzuli şəhərindəki xəstəxanaya daşıyırdıq. Əbdürrəhmanlı kəndi istiqamətində avtomobilimizi minomyotla vurdular. Komandirimiz də, mən də yaralandıq. Bütün bədənim qəlpə yaraları idi. Buna baxmayaraq, yenidən döyüş xəttinə yollandım. Oradakı yaralı əsgərlər məni gözləyirdilər, onlara tibbi yardım göstərmək lazım idi”.
Aqşin yaralanmasına baxmayaraq, müharibə başa çatanadək ən qaynar nöqtələrdə döyüş əməliyyatlarında iştirak edib, Füzulinin Yuxarı Əbdürrəhmanlı, Yuxarı və Aşağı Seyidəhmədli, Xocavəndin Kürdlər, Domi kəndlərinin işğaldan azad olunması uğrunda gedən döyüşlərdə yaralıları döyüş meydanından çıxarıb, onlara ilkin tibbi yardım edib.
“Postlardan birində yüzədək yaralımız var idi. Onları çox çətinliklə, bəzən sürünə-sürünə döyüş meydanından uzaqlaşdırırdım. Özümün də yaralandığımı unutmuşdum. Yalnız müharibə başa çatdıqdan sonra Füzulidəki hospitala getdim, bir müddət orada müalicə olundum”.
Müsahibimiz deyib ki, döyüşlər zamanı insan heç ailəsini, evdə gözləyənlərini, yaxınlarını fikirləşmir, yalnız yanında birlikdə vuruşduğun dostunu, əsgər yoldaşını fikirləşirsən. Yaralananları, şəhid olanları düşünürsən. “Bir-birimizi qoruyurduq. Ancaq Vətən sevgisi var idi. Bizi uşaqlıqdan necə vətənpərvər ruhda böyütmüşdülərsə, ancaq istəyirdik ki, torpaqlarımızı düşməndən geri alaq, yanımızdakı dostumuza, qardaşımıza heç nə olmasın. Döyüş meydanından çıxardığım əsgər yoldaşlarım indi də mənə zəng edərək təşəkkürünü bildirirlər. Deyirlər ki, bizi yaralı vəziyyətdə orada qoymamısan, düşmən əlinə keçməmişik. Mən bundan çox qürurlanıram”,- deyə Qarabağ qazisi vurğulayıb.
Döyüşlərdə göstərdiyi şücaətə görə Aqşin Qurbanzadə “Füzulinin azad olunmasına görə”, “Xocavəndin azad olunmasına görə”, “Hərbi xidmətdə fərqlənməyə görə” medalları ilə təltif olunub.
Bölmənin digər xəbərləri
