DÜŞƏNBƏDƏ 31 MART - AZƏRBAYCANLILARIN SOYQIRIMI GÜNÜ İLƏ ƏLAQƏDAR ANIM MƏRASİMİ KEÇİRİLMİŞDİR

31.03.2009 [16:12]
Çap et
A⁺ A^-

Düşənbə, 31 mart (AZƏRTAC). 31 mart - Azərbaycanlıların soyqırımı günü ilə əlaqədar ölkəmizin Tacikistandakı səfirliyində anma mərasimi keçirilmişdir.

Paytaxtdakı Azərbaycan diasporunun üzvlərinin, səfirliyin əməkdaşlarının və KİV nümayəndələrinin iştirak etdikləri mərasimin əvvəlində soyqırımı qurbanlarının xatirəsi bir dəqiqəlik sükutla yad edilmişdir.

Azərbaycanın Tacikistandakı səfiri Məhərrəm Əliyev ermənilər tərəfindən Azərbaycan xalqına qarşı törədilmiş soyqırımların tariximizin faciəli səhifələrindən biri olduğunu bildirmiş, soyqırımı siyasətinin xronologiyasından, günahsız əhalinin xüsusi amansızlıqla qətlə yetirilmələrindən danışmışdır. Səfir demişdir ki, ümummilli liderimiz Heydər Əliyevin qətiyyəti sayəsində 1998-ci il 26 mart tarixli Fərmanla bu hadisələrə hüquqi-siyasi qiymət verilmiş, soyqırımının köklü tədqiqinə başlanmış, indiyədək bu istiqamətdə çoxlu kitablar çap olunmuşdur.

Səfirlik tərəfindən Tacikistan Xarici İşlər Nazirliyinə, Düşənbədəki səfirlik və beynəlxalq nümayəndəliklərə azərbaycanlıların soyqırımı ilə əlaqədar məlumatlar toplusu göndərilmişdir.

Qulu Kəngərli

AZƏRTAC-ın xüsusi müxbiri

Düşənbə