“Ekoerudit” breyn-rinq yarışının yarımfinal mərhələsi keçirilmişdir
Bakı, 30 mart (AZƏRTAC). ARDNŞ-in Ekologiya İdarəsi, Təhsil Nazirliyi Respublika Ekoloji Tərbiyə və Təcrübəçilik Mərkəzi və 46 nömrəli Məktəbdənkənar İş Mərkəzinin təşkilatçılığı ilə martın 28-29-da “Ekoerudit” breyn-rinq yarışının yarımfinal mərhələsi keçirilmişdir. Yarımfinalda Bakının orta məktəblərinin 8-11-ci sinif şagirdlərindən ibarət 16 komandası iştirak etmiş və bu komandalardan səkkizi yarışmanın final mərhələsinə vəsiqə qazanmışdır.
ARDNŞ-in mətbuat xidmətindən AZƏRTAC-a bildirmişlər ki, Ekologiya İdarəsi tərəfindən yarışmanın bütün iştirakçılarına ARDNŞ-in ekoloji embleminin təsviri olan köynəklər, papaqlar və digər hədiyyələr paylanılmışdır.
“Ekoerudit”in final mərhələsinin aprel ayında keçirilməsi nəzərdə tutulur və bu mərhələdə iştirakçıların ekoloji bilikləri ilə yanaşı, kompyuter proqramlarından və İnternetdən istifadə bacarıqları və məntiqi bilikləri də yoxlanılacaqdır.
Bölmənin digər xəbərləri
