Ekspert: Aprel döyüşləri hərbi-siyasi balansı Azərbaycanın xeyrinə dəyişdirib
Bakı, 30 mart, AZƏRTAC
Aprel döyüşlərindən sonra münaqişənin həllində vasitəçilik edən ölkələrin, eləcə də dünyanın iri dövlətlərinin Azərbaycana münasibətində dəyişikliyin olduğunu hiss etməmək mümkün deyil. Tam qətiyyətlə demək olar ki, uğurlu aprel döyüşləri hərbi-siyasi balansı bizim xeyrimizə əsaslı surətdə dəyişdirib.
2016-cı ilin aprelinə qədər Azərbaycanın xəbərdarlıqlarına ötəri yanaşan ölkələr bu gün qoşunların qarşıdurma xəttində azacıq hərəkətlənmədən narahatlıq keçirir, əməliyyatların yenidən başlanmasından ehtiyatlanırlar.
Bu fikriləri AZƏRTAC-a hərbi-siyasi icmalçı Ramil Məmmədli səsləndirib. O qeyd edib ki, aprel döyüşləri zamanı dünya Ermənistanın əsas qüvvələrinin qısa müddət ərzində məhv edildiyini və gələcək əməliyyatların taleyini həll edə biləcək strateji mövqelərin geri qaytarıldığını gördü. Hətta düşmən tərəfin yüksək rütbəli zabitləri belə Azərbaycan Ordusunun qalib gəldiyini etiraf etmək məcburiyyətində qaldılar. Beləliklə, Azərbaycan Ordusu qarşısına qoyulan döyüş tapşırığını yüksək səviyyədə yerinə yetirdi və sürətli əks-hücum əməliyyatını zəfərlə başa vurdu. Aprel döyüşlərinin beynəlxalq arenada dəyərləndirilməsinə gəlincə, birmənalı demək olar ki, dövlətimizin diplomatiya sahəsində buna qədər həyata keçirdiyi uğurlu tədbirlər öz bəhrəsini verdi.
“Cəbhə xəttində ordumuzun qazandığı uğurun əsasında Azərbaycan Prezidenti, Silahlı Qüvvələrin Ali Baş Komandanı İlham Əliyevin diqqət və qayğısı ilə aparılan ordu quruculuğu dayanır. Azərbaycan Ordusu son illər ən müasir silah və texnika ilə təchiz edilir, müxtəlif qoşun hissələrində mütəmadi döyüş hazırlığı tədbirləri həyata keçirilir, bölmələrimiz məşğələ və təlimlərdə döyüş bacarıqlarını yüksəldir. Aprel döyüşləri göstərdi ki, Silahlı Qüvvələrimiz xalqımızın və ölkə rəhbərliyinin etimadını yüksək səviyyədə doğrultmağa qadirdir. Orduda aparılan islahatlar, quruculuq işləri, keçirilən çoxsaylı təlimlər öz bəhrəsini verib. Ümumiyyətlə, Azərbaycan Silahlı Qüvvələrinin inkişaf dövrünü bir neçə mərhələyə bölmək olar. Ordumuzun hazırda da davam edən Prezident İlham Əliyev dövrü Silahlı Qüvvələrin modernləşməsi, müasir ordular sırasına çıxması baxımından xarakterikdir. Aprel döyüşlərinin timsalında bunu bir daha gördük və Azərbaycan Ordusunun qazandığı qələbələrin sevincini dadmağa başladıq”, - deyə R.Məmmədli bildirib.
Ekspert qeyd edib ki, 2016-cı ilin aprelində ordumuzun düşmən təxribatına cavab olaraq həyata keçirdiyi əks-həmlə nəticəsində geri qaytarılan strateji mövqelər Cəbrayıl rayonunun Cocuq Mərcanlı kəndində vətəndaşların rahat yaşamasına imkan yaratdı. Bu mənada Azərbaycan Prezidentinin müvafiq Sərəncamı ictimaiyyət tərəfindən böyük qayıdışın başlanğıcı kimi dəyərləndirilir. Sərəncamın icrası təmas xəttindəki yaşayış məntəqələrimizin inkişafına da təkan verəcək.
Prezident İlham Əliyevın cəbhəboyu bölgədə yaşayan vətəndaşlarımızın sosial vəziyyəti ilə daim maraqlandığını və bölgəyə vaxtaşırı səfərlər etdiyini xatırladan müsahibimiz deyib: “Bu yaxınlarda Füzuli rayonuna səfər edən dövlətimizin başçısı rayonun inkişafı, infrastruktur layihələrinin həyata keçirilməsi üçün əlavə maliyyə vəsaiti ayırdı. Həmçinin ötən ilin yazında ermənilərin artilleriya atəşləri nəticəsində zədələnən evlər və tikililər təmir və bərpa olunaraq sakinlərin istifadəsinə verildi. Daimi xarakter alan bu proses psixoloji savaşın tərkib hissəsidir. Erməni cəmiyyəti də Azərbaycanda baş verən prosesləri görür və onlarda yaranan daxili narahatlıq Ermənistan hakimiyyətinə qarşı etiraz dalğasına çevrilir”.
Bölmənin digər xəbərləri
