Ekspert: Azərbaycan son 30 ildə ardıcıl iqtisadi artım nümayiş etdirir
Bakı, 4 aprel, AZƏRTAC
Bu il Azərbaycanda Ümumi Daxili Məhsulun (ÜDM) artımı gözlənilir. Bəzi böhran vaxtlarını və pandemiya illərini çıxmaq şərti ilə Azərbaycan son 30 ildə ardıcıl iqtisadi artım nümayiş etdirir. Ümumiyyətlə qarşıdakı 3 ildə ÜDM-in artımı təqribən 3-4 faiz arasında olacaq.
Bu fikirləri AZƏRTAC-a açıqlamasında ekspert Xalid Kərimli söyləyib.
O bildirib ki, adambaşına düşən ÜDM-in artımı da müşahidə olunur: “Hökumətin əsas məqsədi bu artımı stimullaşdırmaqdır. Dayanıqlı iqtisadi artımın təmin edilməsi sonda həyat səviyyəsinin yaxşılaşdırılmasına müsbət təsir göstərəcək. Əsas məqsədlərdən biri iqtisadi artımın sürətləndirilməsi və iqtisadi inkişafda əhalinin inklüzivliyinin təmin edilməsidir. Bu baxımdan ölkəmizin potensialı çox böyükdür. Tədbirlər də onu göstərir ki, iqtisadi artımın daha da sürətləndirilməsi və dayanıqlı formada təmin edilməsi istiqamətində çalışılır”.
Xalid Kərimli vurğulayıb ki, Azərbaycan dünyada ortalama adam başına düşən ÜDM göstəricisini hazırkı vəziyyətdə üstələyə bilir. Bu nəticənin daha da yaxşılaşdırılması üçün ÜDM-in artımı bundan sonra da davam etdirilməlidir. Qeyri-neft sektorunda ÜDM-in formalaşması və inkişaf etdirilməsinə xüsusi diqqət yetirilməlidir. Hökumət də bu istiqamətdə prioritetləri müəyyənləşdirir və gələcək inkişafın əhəmiyyətini bu sahələrdə görür.
Onun sözlərinə görə, ÜDM-in artımında proqnozlar müxtəlifdir: “Ümumi nəticə olaraq 2 faizin üzərində, 4 faizin altında iqtisadi artım olacaq. Önəmli olan isə odur ki, bu artımlar qeyri-neft sektorunun hesabına təmin olunacaq. Hökumət dayanıqlı iqtisadi artımı gələcəkdə də təmin etməlidir ki, bu, tədricən insanların həyat səviyyəsinin yaxşılaşmasına gətirib çıxarsın. Burada isə ən önəmli addım ÜDM-in artımıdır”.
Bölmənin digər xəbərləri
