Əliməmməd Nuriyev: Əfv Sərəncamı Azərbaycan Prezidentinin milli həmrəyliyə istiqamətlənmiş növbəti humanist addımdır
Bakı, 19 mart, AZƏRTAC
Prezident İlham Əliyev daim ölkəmizdə humanizm və mərhəmət prinsiplərinin əsas götürülməsi istiqamətində müxtəlif qərarlar qəbul edib. Belə ki, dövlətimizin başçısının fəaliyyəti ədalətə, humanizm və mərhəmət prinsiplərinə söykənir. Dövlətimizin başçısının 2003-cü ildən bu günədək qəbul etdiyi hər bir qərarda, imzaladığı sənədlərdə onun siyasi iradəsinin şahidi oluruq. Bu gün 625 nəfərin əfv edilməsi ilə bağlı Sərəncamın imzalanması dövlətimizin başçısının öz fəaliyyətində bu prinsiplərə əsaslandığını göstərir. Prezident İlham Əliyev Novruz bayramı ərəfəsində növbəti dəfə humanizm nümayiş etdirərək məhkumlara, onların ailələrinə, yaxınlarına və ümumiyyətlə, minlərlə insana sevinci bəxş etdi.
Bunu tanınmış hüquqşünas, “Konstitusiya” Araşdırmalar Fondunun prezidenti Əliməmməd Nuriyev AZƏRTAC-a açıqlamasında deyib.
Ekspert bildirib ki, bununla azadlıqdan məhrumetmə cəzasına məhkum olunmuş 475 nəfər cəzasının çəkilməmiş hissəsindən azad edilib. Bundan başqa, 98 məhkumun cəzasının çəkilməmiş hissəsi yarıyadək azaldılıb. Eləcə də azadlıqdan məhrumetmə cəzasına şərti olaraq məhkum edilmiş iki nəfər cəzadan azad ediliblər. Həmçinin azadlıqdan məhrum etmə cəzasına məhkum edilmiş və cəzasının çəkilməsi təxirə salınmış üç nəfər cəzadan azad olunublar. Azadlığın məhdudlaşdırılması cəzasına məhkum edilmiş 9 nəfər və islah işləri cəzasına məhkum olunmuş 12 nəfər cəzanın çəkilməmiş hissəsindən, cərimə cəzasına məhkum olunan 23 nəfər isə cəzadan azad ediliblər.
Ə.Nuriyev qeyd edib ki, azad edilmiş şəxslərin siyahısına baxdıqda cəmiyyətin ayrı-ayrı təbəqələrinə aid şəxslərin olduğunu görə bilərik. Bu da humanizmin, mərhəmətin təzahürüdür. Bu onu göstərir ki, Azərbaycan dövləti hər zaman öz vətəndaşının qayğısına qalır. Sənəddə müxtəlif siyahılarda adları hallanan 39 nəfərdən otuzu Nardaran, üçü isə Gəncə hadisələrində iştirak ediblər. Eyni zamanda, beş nəfər Azərbaycan Xalq Cəbhəsi partiyasının üzvü olanlardır. Eləcə də bir jurnalist azad edilib.
Hüquq müdafiəçisi diqqətə çatdırıb ki, bu, Prezident İlham Əliyevin milli həmrəyliyə istiqamətlənmiş növbəti humanist addımdır. Ölkə başçısı hər zaman öz fəaliyyətində mərhəmət, qayğıkeşlik və humanizm prinsiplərini prioritet hesab edib. Bu, Prezident İlham Əliyevin indiyədək imzaladığı 36-cı, ümumiyyətlə isə Azərbaycanda sayca 67-ci əfv Sərəncamıdır. Ölkəmizdə indiyədək imzalanan əfv sərəncamları, ümumilikdə, 9 minə yaxın şəxsi əhatə edib. Bütövlükdə onların əksəriyyəti azadlıqdan məhrumetmə cəzasının çəkilməmiş hissəsindən azad olunublar. Sərəncamı əhatə edən məhkumlar arasında müxtəlif cinayətlər törətmiş şəxslər, eləcə də əcnəbilər, qadınlar vardır. Sənədə əsasən bir neçə məhbusun cəzasının müddəti də azaldılıb. Belə ki, ömürlük azadlıqdan məhrum etmə cəzasına məhkum edilmiş üç nəfərin cəzası 25 il müddətə azadlıqdan məhrum etmə cəzası ilə əvəzlənib. Eləcə də bu əfv Sərəncamı məhkum olunmuş 28 qadına da şamil edilib.
Tanınmış hüquqşünas vurğulayıb ki, bu yanaşma cəza siyasəti sahəsində aparılan islahatların göstəricisidir. Bu, həm də dövlətimizin başçısının Azərbaycanın bütün vətəndaşlarına humanizm və mərhəmət prinsipləri əsasında yaxınlaşmasının göstəricisidir. Digər bir mühüm məsələ ondan ibarətdir ki, bütövlükdə əfv sərəncamları Cinayət Məcəlləsinin bu və digər maddələrini əhatə edib. Burada vacib məqam məhkum olunmuş şəxslərin ailə üzvlərinin Prezidentə ünvanlanmış əfv haqqında müraciətləri, məhkumların şəxsiyyətini, səhhətini, ailə vəziyyətini, törətdikləri cinayətlərin xarakterini və ictimai təhlükəlilik dərəcəsini, cəza çəkdikləri müddətdə davranışları nəzərə alınaraq obyektiv qərarların qəbul olunmasıdır.
“Bu sənəd Prezident İlham Əliyevin “Məhkəmə-hüquq sistemində islahatların dərinləşdirilməsi haqqında” 2019-cu il 3 aprel tarixli Fərmanında əksini tapmış cəza siyasətinin humanistləşdirilməsi və cinayətlərin dekriminallaşdırılması üzrə tədbirlərin davamıdır. Həmçinin Prezident İlham Əliyev tərəfindən mütəmadi olaraq əfv sərəncamlarının və amnistiyaların imzalanması ölkəmizdə vətəndaş həmrəyliyinin daha da möhkəmlənməsinə xidmət edir”, - deyə Əliməmməd Nuriyev əlavə edib.
Sərəncamın əfv edilmiş şəxslərə yeni şans verdiyini vurğulayan ekspert ümid etdiyini bildirib ki, onlar bu imkandan faydalanaraq dövlətimizin başçısının Novruz bayramı münasibətilə onlara göstərdiyi bu lütfü dəyərləndirəcəklər. Azərbaycanın inkişafına, rifahına töhfələrini verəcək, ailələrinin qayğılarına qalacaqlar. Bu baxımdan Sərəncamın siyasi, hüquqi, iqtisadi, sosial, mənəvi və humanitar əhəmiyyəti böyükdür.
Bölmənin digər xəbərləri
