ELMİ-İCTİMAİ EKSPEDİSİYA AVEY QORUĞUNA YOLA DÜŞÜR
Müstəqil Memarlar Assosiasiyasının prezidenti Zemfira Budaqova AZƏRTAC-ın müxbirinə bildirmişdir ki, Avey qoruğunda bərpa edilməyə ehtiyacı olan xeyli tarixi abidə vardır. Xalqımız Damcılı qalası, tanınmış alim Davud Axundovun araşdırmalarına görə, eramızdan əvvəl 1-ci əsrə aid Didivan mağaralarını və digər tarixi abidələri ən yüksək səviyyədə qorumalıdır, çünki bu abidələr həmin torpaqların məhz Azərbaycana məxsus olduğunu sübut edir.
Ekspedisiyada Müstəqil Memarlar Assosiasiyasının nümayəndələri ilə yanaşı, Qafqaz Konfederasiyasına daxil olan “Milli-mədəni irsin öyrənilməsi” təşkilatının alimləri və Avey qoruğunun əməkdaşları da iştirak edirlər.
Ekspedisiya bir həftə çəkəcəkdir.
Xatırladaq ki, aprelin 23-də Qafqaz Konfederasiyası Elm-İstehsalat Birliyi tarixi abidələrin və kurqanların bərpası mövzusunda mətbuat konfransı keçirmiş və orada Mədəniyyət Nazirliyinin məsul işçiləri də iştirak etmişlər. Nazirliyin tarixi və mədəni abidələrin mühafizəsi şöbəsinin rəisi Rizvan Bayramov arxeoloji qazıntılar aparılmasının, habelə Azərbaycanın qədim və orta əsrlər tarixi abidələrinin tam mənzərəsini yaratmaq üçün Qazax rayonu hüdudlarından kənara çıxmağın zəruriliyini söyləmişdir.
