Energetiklər peşə bayramlarını qeyd ediblər
Bakı, 20 oktyabr, AZƏRTAC
Oktyabrın 20-də energetiklərin peşə bayramı günü ilə əlaqədar Energetika Nazirliyi, “AzərEnerji” və “Azərişıq” ASC-lərin rəhbər heyəti Ulu Öndər Heydər Əliyevin məzarını ziyarət edib, Ümummilli Liderin abidəsi önünə əklil qoyublar.
Görkəmli oftalmoloq-alim akademik Zərifə xanım Əliyevanın xatirəsi də ehtiramla anılıb, məzarı üzərinə tər güllər düzülüb. Şəhidlər xiyabanı da ziyarət olunub.
AZƏRTAC xəbər verir ki, daha sonra “AzərEnerji”nin Baş İdarəetmə Mərkəzində Energetiklər Günü ilə bağlı tədbir keçirilib.
“AzərEnerji” ASC-nin rəhbəri Baba Rzayev çıxış edərək builki Energetiklər Gününün çox əlamətdar vaxta təsadüf etdiyini bildirib. “Əvvəla ona görə ki, 5 gün əvvəl - oktyabrın 15-də Prezident, Müzəffər Ali Baş Komandan İlham Əliyev şanlı bayrağımızı Xankəndi, Ağdərə, Xocalı, Xocavənd rayonlarında ucaltdı. Digər tərəfdən, həmin gün Prezidentin hakimiyyətə gəlməsinin 20 illiyinə təsadüf edirdi. Bu illər ərzində Azərbaycan dövləti tarixi boyu heç zaman bu qədər inkişaf etməyib və güclü olmayıb. Bütün sahələrdə olduğu kimi elektroenergetikamızın bugünkü səviyyəyə çatması, Azərbaycanın sayılıb-seçilən enerji dövləti titulunu alması, ən müasir texniki avadanlıqlarla təchiz olunaraq rəqəmsallaşdırılması, alternativ və bərpaolunan enerjinin prioritet sahəyə çevrilməsi, qırxa yaxın yeni elektrik stansiyasının tikilməsi, yüzdən artıq yarımstansiyanın tikilərək yenidən qurulması, min kilometrlərlə müxtəlif gərginlikli ötürmə xətlərinin çəkilməsi, hazırda ölkədə istehsal olunan enerjinin 20 faizə yaxın hissəsinin ixrac edilməsi və digər bu kimi məsələlər Prezident İlham Əliyevin davamlı enerji strategiyasının həyata keçirilməsinin təzahürüdür”, - deyə Baba Rzayev vurğulayıb.
Baba Rzayev bildirib ki, Prezident İlham Əliyevin xüsusi diqqəti və enerji strategiyasına uyğun olaraq bu günə kimi Qarabağ və Şərqi Zəngəzurda 12 yerdə yarımstansiya tikilərək istismara verilib və 700 kilometrdən artıq 330 və 110 kV-luq yüksəkgərginlikli ötürmə xətti çəkilərək bütün işğaldan azad edilən ərazilərə 100 faiz enerji çatdırılıb. Ən əsası bütün yarımstansiyalar Azərbaycanın ümumi enerji sisteminə qoşulub. Eyni zamanda, Prezidentin işğaldan azad edilən ərazilərin “yaşıl enerji” zonasına çevrilməsi ilə bağlı tapşırığına uyğun olaraq bu günə kimi 14 yerdə su elektrik stansiyası tikilərək yenidən qurulub və hazırda 3 SES-də işlər tamamlanır və 9 yerdə tikinti davam edir. Eyni zamanda suverenliyimiz bərpa edilən ərazilərdə stansiya və yarımstansiyalar bərpa edilir.
Tədbirdə çıxış edənlər bildirib ki, bu gün Azərbaycanın energetika sektoru dünyanın bir çox ölkələrinə, o cümlədən inkişaf etmiş ölkələrinə nümunə göstəriləcək səviyyədədir. Bu isə heç şübhəsiz, Prezident İlham Əliyevin elektroenergetika ilə bağlı həyata keçirdiyi uğurlu enerji strategiyasının, davamlı diqqət və qayğısının nəticəsidir.
Bütün bunlara görə çoxminlik “AzərEnerji” kollektivi adından Prezidentə xüsusi minnətdarlıq və sonsuz təşəkkürlər ifadə olunub.
Bölmənin digər xəbərləri
