Erməni jurnalisti ölkəsində çoxuşaqlı ailələrin acınacaqlı vəziyyətindən bəhs etmişdir
Paris, 5 avqust (AZƏRTAC). Parisdə gündəlik nəşr olunan “Ermənistan xəbərləri” (Les Nouvelles d’ Armenie) jurnalının 3 avqust tarixli nömrəsində “Armenia Now.com”un müxbiri Sara Xodjayanın məqaləsi dərc olunmuşdur. Məqalədə Ermənistan iqtisadiyyatının iflic vəziyyətinə düşməsi nəticəsində ölkədə çoxuşaqlı ailələrin yoxsulluğa daha çox məruz qalmalarından və bu ailələrin acınacaqlı vəziyyətindən bəhs olunur.
Ermənistandakı real vəziyyətin tam ətraflı əks olunduğu məqalənin maraq doğuracağını nəzərə alaraq onu müəyyən ixtisarlarla oxuculara təqdim edirik: “Birləşmiş Millətlər Təşkilatının Ermənistandakı nümayəndəsi ilə ölkənin iqtisadi vəziyyəti və əhalinin yaşayış səviyyəsi barədə söhbət edərkən o bildirdi ki, dövlət tərəfindən ayrılan cüzi sosial yardım bütün çoxuşaqlı ailələri təmin etməkdə acizdir. Dörd və daha çox uşaqlı erməni ailələrin vəziyyəti son dərəcə acınacaqlıdır. Kişilərin əksəriyyəti işləmək üçün Ermənistanı tərk edərək Rusiyaya və yaxud digər xarici ölkələrə üz tutmuşlar. Ailənin bütün ağırlığı qadınların üzərinə düşmüşdür. Ailənin yeganə başçıları hesab edilən bu qadınların da əksəriyyəti işsizdir. Ölkə statistika idarəsinin məlumatına görə, Ermənistandakı işsizlərin 70 faizini qadınlar təşkil edir. Dörd və daha çox uşaqlı ailələrin 70 faizi yoxsulluğun məngənəsində əzab çəkir. Ölkə əhalisinin 36, uşaqların isə 41 faizi yoxsulluğun son həddində yaşayır.
Bəzi qadınlar yarıac-yarıtox vəziyyətdəki uşaqlarını dolandırmaq üçün günəmuzd işlərə getmələri barədə məlumat vermir, çox vaxt isə dövlət rəsmlərini aldatmağa çalışırlar.
Məsələn, Qayane adlı 8 uşaq anası işlədiyini dövlətdən gizlətməyə məcburdur. Əgər onun işlədiyi məlum olarsa, o uşaqlara görə hər ay dövlətdən aldığı 150 dollarlıq yardımı itirə bilər. Ona görə də Qayane işlədiyini gizli saxlamaları üçün onunla birlikdə çalışanlara dəfələrlə yalvarmalı olmuşdur. Onun həyat yoldaşı da ayda 150 dollar məvacib alır. Həmin maaş və dövlət tərəfindən verilən cüzi yardım Yerevanın kənarındakı yataqxananın iki otaqlı mənzilində məskunlaşmış bu on nəfərlik ailənin heç yeməyinə çatmır”.
Yoxsulluğun son həddində və acınacaqlı vəziyyətdə yaşayan ailələr öz uşaqlarını Əmək Nazirliyinin açdığı xüsusi uşaq evlərinə verməyə məcbur olmuşlar. Ermənistanda 8 belə uşaq pansionatı mövcuddur. Həmin pansionatların hər birində 800 uşaq yerləşdirilmişdir. Qayanenin 8 uşağından dördü həmin uşaq evlərinin birində yerləşdirilmişdir. Ölkədə yaşayış səviyyəsinin getdikcə dözülməz vəziyyət almasından şikayət edən bu qadın bildirmişdir ki, əgər normal iş yeri tapılmırsa, deməli hakimiyyət də yoxdur. Mənzilimiz o dərəcədə darısqaldır ki, uşaqlar oturmağa yer tapmırlar. Yeməyə pul çatdıra bilmirik. Çörək zavodunda işləyən tanış qız hər gün bizə üç çörək gətirir. Onun pulunu ayın sonunda zorla ödəyirik. Əgər pansionata verdiyimiz dörd uşaq da evdə olarsa, bu üç çörək bir dəqiqənin içərisində yoxa çıxar.
Ermənistanda yaranmış acınacaqlı və dözülməz vəziyyət ölkədə 25 min uşağa yardım etmək istəyən “ World vision “ kimi beynəlxalq qeyri-hökumət təşkilatını ciddi narahat etmişdir.
Təşkilatın Ermənistandakı nümayəndəsi dövlət rəsmilərinə istinadən ölkədə yoxsulluğun keçən illə müqayisədə 10 faiz artdığını bildirmişdir. Yardımları ilə uşaqları öz ailələrinə qaytarmağa çalışan təşkilatın səyləri heç bir nəticə verməyəcəkdir. Çünki ölkədə vəziyyət onların düşündüyündən də ağırdır.
Martunidəki qadınlar şurasının rəhbəri Anait Gevorkyan ərlərinin tərk edib getdikləri kəndli qadınların vəziyyətinin daha ağır olduğunu bəyan etmişdir. Adi qadınlıq hisslərindən belə məhrum olan bu qadınlar ev işləri ilə bərabər təsərrüfatda çalışmaqla ailələrini dolandırmağa məcburdurlar. Ailəni dolandırmaq bəhanəsi ilə başqa ölkələrə, xüsusilə Rusiyaya üz tutan kişilər orada başqa qadınla evlənir və doğma yerlərə, ailəsinə, Vətəninə qayıtmağı bir dəfəlik yaddan çıxarırlar. Ona görə də ailənin bütün ağırlığı bir, iki ay deyil, bütün həyatı boyu bu qadınların üzərinə düşür.
Ermənistanda bu acınacaqlı vəziyyətin nə vaxta qədər davam edəcəyini heç kəs bilmir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
