ERMƏNİLƏR TORPAQLARIMIZDA QANLI QIRĞINLAR TÖRƏTMİŞLƏR
Bakı, 31 mart (AZƏRTAC). Azərbaycan Memarlıq və İnşaat Universitetində 31 mart - Azərbaycanlıların soyqırımı gününə həsr olunmuş toplantı keçirilmişdir.
Universitetin rektoru, professor Gülçöhrə Məmmədova, Milli Məclisin deputatı Elman Məmmədov və başqaları xalqımıza qarşı törədilmiş bu qanlı cinayətlərə siyasi qiymətin verilməsinin ümummilli lider Heydər Əliyevin adı ilə bağlı olduğunu söyləmiş, soyqırımı gününün ulu öndərin təşəbbüsü ilə 1998-ci ildən başlayaraq hər il dövlət səviyyəsində qeyd edildiyini xatırlatmışlar.
Natiqlər daşnakların vəhşiliyinə dair çoxlu faktlar gətirərək bildirmişlər ki, təkcə 1918-ci ilin mart-aprel aylarında Bakı, Şamaxı, Quba, Göyçay və Lənkəranda erməni-bolşevik silahlı dəstələri 50 mindən çox azərbaycanlını qətlə yetirmiş, on minlərlə dinc sakini yurd-yuvasından didərgin salmışlar.
1918-ci il qırğınlarının qarşısının alınmasında qardaş türk əsgərlərinin rəşadəti və fədakarlığı xüsusi vurğulanmışdır.
Bölmənin digər xəbərləri
