Ermənilərin nəzarətində olan REGNUM agentliyi qeyri-rəsmi şəxsin “üzrxahlığını” bütün Moldovaya aid etmişdir
Bakı, 6 iyul (AZƏRTAC). Ermənilərin nəzarətində olan REGNUM informasiya agentliyinin dərc etdiyi məlumatın sərlövhəsi, yumşaq desək, həmin məlumatın məzmununa uyğun gəlmir. Sərlövhə belədir: “Moldova Ermənistan parlamentində antierməni ruhlu bəyanatlara görə üzr istəmişdir” (http://regnum.ru/news/fd-abroad/armenia/1680589.html). Lakin məlumatın mətnindən bəlli olur ki, Moldovanın adından üzr istəyən... Moldova Konstitusiya Məhkəməsinin üzvü Viktor Popandır. Prezident yox, parlamentin spikeri yox, Baş nazir yox, hətta Konstitusiya Məhkəməsinin sədri də yox, sonuncu qurumun bir üzvü üzr istəmişdir. Hələ yaxşı ki, üzr istəyən adam Konstitusiya Məhkəməsinin sədrinin şəxsi sürücüsü və nəvələrinin dayəsi deyil.
Popan bildirmişdir ki, Moldova ombudsmeni Aureliya Qriqoriu “öz şəxsi fikrini” ifadə etmişdir. O demişdir: “Moldova parlamenti bu hadisəyə görə təəssüflənir. Mən parlament adından üzr istəməyə müvəkkil edilmişəm”.
Hərçənd, ona Moldova parlamentinin bütün üzvlərinin, ən azı onların əksəriyyətinin adından çıxış etmək səlahiyyəti verilməsi barədə onların imzaladığı sənəd olduğuna inanmaq çətindir. Popanın fikri, xüsusən onun üzr istəməsi şəxsi məsələdir və REGNUM informasiya agentliyinin baş redaktoru Vigen Akopyan nə qədər istəsə də, bunu bütün Moldova adından üzrxahlıq kimi qəbul etmək olmaz. Biz şübhə etmirik ki, Moldova deputatlarının çoxu onların xəbəri olmadan bir fırıldaqçının beynəlxalq təşkilatların çoxsaylı sənədlərində təsbit olunmuş həqiqətə görə üzr istəməsini biləndə təəccüblənəcəklər.
Yerevan özü-özünü pis vəziyyətə salmışdır. İndi bu vəziyyəti bir növ hamarlamağa çalışan bəzi erməni KİV-ləri isə REGNUM agentliyinin saxta məlumatına istinad edərək belə də yazırlar: “İnsidentə son qoyuldu - Moldova üzr istədi”. Amma bizə belə gəlir ki, insidentə heç də son qoyulmamışdır, əksinə, o, qızışdırılır. Moldova necə “üzr istəyə bilər” ki, bu ölkənin Xarici İşlər Nazirliyi etiraz notası hazırlayır? Burada məntiq varmı?
Son olaraq öz həmvətənlərini ağıllarını itirmiş ev sahiblərinin əlində girov qoyaraq sakitcə aeroporta yola düşmüş Moldova nümayəndə heyətinin üzvlərini qınamaq istərdik. Bu yaxınlarda yayılmış bir klipdən göründüyü kimi, hətta camışlar da körpə camış balasını şirin pəncəsində qoyub getmir, onu xilas etmək üçün naxırla geri qayıdırlar. Moldova nümayəndə heyətinin üzvləri isə öz həmvətənlərini atıb gedirlər. Axı, onlar həmin qadını atıb getməkdən imtina etməli və onun dərhal azad olunmasını tələb etməli idilər. Ayıbdır!!!
Bölmənin digər xəbərləri
