Estoniyada Ümummilli Lider Heydər Əliyevin xatirəsi anılıb
Bakı, 13 dekabr, AZƏRTAC
Azərbaycanın Estoniyadakı səfirliyinin təşkilatçılığı ilə Tallin şəhərində Ümummilli Lider Heydər Əliyevin vəfatının 21-ci ildönümünə həsr olunan anım mərasimi keçirilib.
Səfirlikdən AZƏRTAC-a bildiriblər ki, əvvəlcə Ulu Öndərin əziz xatirəsi bir dəqiqəlik sükutla yad olunub.
Azərbaycanın Estoniyadakı səfiri Anar Məhərrəmov çıxışında Ümummilli Liderin şərəfli ömür yolundan, xalqın təkidli tələbi ilə hakimiyyətə qayıdaraq müasir Azərbaycan dövlətinin memarı və qurucusu kimi Vətən qarşısında misilsiz xidmətlərindən danışıb.
Səfir Ulu Öndərin bir rəhbər kimi bütün müsbət keyfiyyətləri özündə cəmləşdirən nadir şəxsiyyət olduğunu, bütün ömrünü xalqın və Vətənin rifahına, inkişafına həsr etdiyini, məhz xalqın dəstəyinə arxalanaraq Azərbaycanı məhv olmaq təhlükəsindən xilas etdiyini vurğulayıb.
Ümummilli Liderin Azərbaycana rəhbərlik etdiyi illərdə uğurla həyata keçirdiyi daxili və xarici siyasət nəticəsində ölkəmizin nüfuzunun daha da artdığı, müstəqilliyimizin əbədi və dönməz olmasında Ulu Öndərin müstəsna xidmətləri diqqətə çatdırılıb.
Xüsusi qeyd edilib ki, Heydər Əliyevin ən böyük arzusu və vəsiyyəti işğal olunmuş ərazilərin azad edilməsi, ölkənin ərazi bütövlüyünün bərpası idi. Ulu Öndərin bu vəsiyyəti Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində yerinə yetirildi. Məhz buna görə sevindirici haldır ki, Heydər Əliyevin anım günü bu gün Azərbaycanın işğaldan azad edilmiş bütün suveren ərazilərində keçirilir.
Həmçinin bildirilib ki, əsası Heydər Əliyev tərəfindən qoyulan siyasət bu gün Prezident İlham Əliyev tərəfindən uğurla davam etdirilir, Azərbaycanın dünya miqyasında nüfuzu daha da artır, ölkəmiz irimiqyaslı beynəlxalq tədbirlərin keçirildiyi məkana çevrilib. Bu yaxınlarda Bakıda uğurla keçirilən COP29 buna bariz nümunədir.
Sonra çıxış edən Estoniya parlamentinin (Riigikogu) üzvü, Estoniya-Azərbaycan parlamentlərarası dostluq qrupunun sədr müavini xanım Mariya Yufereva-Skuratovski müstəsna Lider və dövlət xadimi Heydər Əliyevin xatirəsinə həsr olunmuş anım mərasimində iştirakında qürur hissi keçirdiyini deyib, Ulu Öndərin həyatının və irsinin Vətənə, xalqa bağlılığın əbədi nümunəsi olduğunu söyləyib.
O, Heydər Əliyevin təkcə uzaqgörən Lider kimi deyil, həm də Azərbaycanın davamlı inkişafının və rifahının memarı kimi ehtiramla yad edildiyini vurğulayıb.
İkitərəfli münasibətlərə toxunan xanım M.Yufereva-Skuratovski Estoniya ilə Azərbaycan arasında çoxillik dostluq və səmərəli əməkdaşlığın qarşılıqlı anlaşma, hörmət əsasında qurulduğunu qeyd edib.
Daha sonra Ümummilli Lider Heydər Əliyevin həyat və fəaliyyətini əks etdirən videoçarx nümayiş olunub. Eyni zamanda, tədbir iştirakçıları Ulu Öndərin həyat və fəaliyyətindən bəhs edən foto və kitab sərgisi ilə tanış olublar.
Tədbirdə Estoniya parlamentinin (Riigikogu) üzvləri, 2002-2005-ci illərdə Estoniyanın xarici işlər naziri olmuş Kristiina Oyuland, bu ölkədəki diplomatik korpusun nümayəndələri, Azərbaycan icmasının üzvləri, yerli ictimaiyyətin və kütləvi informasiya vasitələrinin təmsilçiləri iştirak ediblər.
Bölmənin digər xəbərləri
