Fahrettin Koca: ağır və aktiv xəstə sayımız artmaqda davam edir
İstanbul, 26 oktyabr, AZƏRTAC
Bu gün 2017 yeni yoluxma faktı qeydə alınıb. Ağır və aktiv xəstə sayımız artmaqda davam edir. Bu gedişatı dəyişmək bizim əlimizdədir. Bir-birimizin haqqına hörmət etməli və qaydalara birgə riayət etməliyik.
AZƏRTAC xəbər verir ki, bu fikirləri Türkiyənin Səhiyyə naziri Fahrettin Koca rəsmi “Twitter” hesabında ölkədəki COVID-19-la bağlı son vəziyyət barədə açıqlamasında bildirib.
Məlumatda qeyd edilir ki, son 24 saat ərzində Türkiyədə ağır xəstə sayı 1744-ə yüksəlib, 112 min 215 nəfər COVID-19 testindən keçirilib ki, onlardan 2017-də xəstəlik aşkarlanıb. Bu müddət ərzində COVID-19 diaqnozu qoyulan 72 nəfər vəfat edib. 1297 nəfər sağalaraq evə buraxılıb. Bununla da Türkiyədə COVID-19-da sağalanların sayı 314 min 390-a yüksəlib.
Qeyd edək ki, Türkiyədə ümumi COVID-19 xəstələrinin 40 faizi İstanbuldadır. Qabaqlayıcı tədbirlər çərçivəsində İstanbulun demək olar ki, bütün xəstəxanalarında COVID-19 mərkəzləri yaradılıb.
Türkiyənin ən böyük şəhərlərindən olan İzmirdə də son 20 gün ərzində COVID-19-a yoluxanların sayı 3,5 dəfə artıb.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
