Faktiki hava: Azərbaycanın dağlıq ərazilərinə qar yağıb
Bakı, 17 oktyabr, AZƏRTAC
Ekologiya və Təbii Sərvətlər Nazirliyinin Milli Hidrometeorologiya Departamenti ölkə ərazisində müşahidə olunmuş faktiki hava şəraiti ilə bağlı məlumat yayıb.
Məlumatda bildirilir ki, oktyabrın 16-sı gündüzdən 17-si səhərədək ölkə ərazisində qeyri-sabit hava şəraiti davam edib, şimşək çaxıb, yağış yağıb, bəzi yerlərdə intensiv olub. Dağlıq və dağətəyi rayonlarda sulu qar və qar yağıb.
Bakıda və Abşeron yarımadasında yağıntının miqdarı 3-43 millimetr, Böyük Qafqazda isə 1-42 millimetr təşkil edib. Yağan leysan yağışlarla əlaqədar Balakənçay, Talaçay, Kürmükçay və Kişçayda sululuq artıb.
Yağıntının miqdarı Kiçik Qafqazda 1-2 millimetr, Qazax-Gəncə zonasında 1-12 millimetr, Mərkəzi Aran rayonlarında 1-3 millimetr, Lənkəran-Astara zonasında isə 1-81 millimetr olub.
Qar örtüyünün hündürlüyü Böyük Qafqazın dağlıq və dağətəyi rayonlarında - Xınalıqda 18, Qonaqkənddə 11, Qırızda 7, Susayda 6, Ləzədə 5, Nohurdüzündə 4, Xaldanda 3, Altıağacda 2, Sarıbaşda (Qax) 3 santimetr təşkil edib.
Bölmənin digər xəbərləri
