MƏDƏNİYYƏT
Fariz Əhmədov: Moskvalıların və rusiyalı kinematoqrafçıların Azərbaycan kino həftəsinə marağı bizi sevindirməyə bilməz
Moskva, 14 fevral, AZƏRTAC
Moskvanın “İllüzion” kinoteatrında Azərbaycan kinosunun geniş retrospektivi təqdim edilir. Azərbaycan kinosu retrospektivinin açılışına rejissor Fariz Əhmədovun “Sonuncu” sənədli filminin nümayişi ilə start verilib.
C.Cabbarlı adına “Azərbaycanfilm” kinostudiyasının direktoru Fariz Əhmədov AZƏRTAC-a müsahibəsində milli kinomuzun qarşısında duran vəzifələrdən, reallaşdırılan layihələrdən, görülən işlərdən, əldə olunan uğurlardan və mövcud problemlərdən danışıb. O, müsahibəsində həmçinin Azərbaycan mədəniyyətinin təbliğində bu cür tədbirlərin əhəmiyyətindən, Rusiya ilə mədəni əlaqələrin inkişafından, eyni zamanda AZƏRTAC haqqında film üzərində işləməsindən bəhs edib.
“Azərbaycan kinosu. Retrospektiv” adlı proqramda müxtəlif dövrlərdə çəkilmiş 19 film nümayiş olunur”
Əvvəlcə Moskvaya səfərinin məqsədi barədə sualı cavablandıran Fariz Əhmədov deyib:
-Fevral 7-dən 15-dək Rusiya Federasiyasının Moskva şəhərində fəaliyyət göstərən “İllüzion” (“Иллюзион”) kinoteatrında Azərbaycan Respublikası Mədəniyyət Nazirliyinin və Rusiya Federasiyası Dövlət Film Fondunun dəstəyi ilə Azərbaycan kinosu həftəsi keçirilir. Proqramda Azərbaycan kinosunun səssiz filmlərindən başlayaraq, müxtəlif dövrlərdə çəkilmiş 19 film nümayiş olunur. “Azərbaycan kinosu. Retrospektiv” adlı proqrama 1935-ci ildən bu günə qədər olan dövrü əhatə edən komediya və triller, nağıl və detektiv hekayələr, kinoromanlar, sosial dramlar və sürreal təmsillər daxildir. Sovet dövrünün son səssiz filmlərindən biri olan “Dəcəl dəstə”dən tutmuş, müstəqillik dövrünün ilk filmlərdən biri olan “Yarasa”ya, müharibədən sonrakı və mülayimləşmə dövrü filmlərindən beynəlxalq festivalları fəth edən müasir müəllif filmlərinə qədər müxtəlif dövrlərə aid proqram Azərbaycan kinematoqrafiyasının geniş janr və üslublarını nümayiş etdirir. Filmlər Rusiya Dövlət Film Fondunun arxivindən olan 35 mm-lik kinolentdən və Azərbaycan Dövlət Film Fondu tərəfindən təqdim olunan rəqəmsal nüsxələrdən nümayiş etdirilir. Nümayişlər kino tənqidçilərinin mühazirələri və rejissorlarla görüşlərlə müşayiət olunur.
Azərbaycan kinosu retrospektivinin açılışına rejissoru olduğum, premyerası 2021-ci ildə Rotterdam kinofestivalında baş tutan “Sonuncu” adlı sənədli film ilə start verilib.
İstər Moskva sakinlərinin, istərsə də rusiyalı kinematoqrafçıların Azərbaycan kino həftəsinə yetərincə marağı, əlbəttə, bizi sevindirməyə bilməz.
“Moskvada müştərək film layihələrinin reallaşdırılması istiqamətində danışıqlar aparılıb”
-Rusiya ilə mədəni əlaqələrin, xüsusilə kinematoqrafiya sahəsində əməkdaşlığın genişləndirilməsi məqsədilə hansı tədbirlər nəzərdə tutulur?
-“Azərbaycan kinosu. Retrospektiv” adlı proqramda iştirak etmək üçün Moskva şəhərinə geniş nümayəndə heyəti ezam olunub. Mədəniyyət Nazirliyinin Audiovizual və interaktiv media şöbəsinin müdiri Rufər Həsənovun rəhbərliyi altında müxtəlif dövlət və özəl kinoşirkətləri, yayım və distribusiya şirkətləri ilə görüşlər keçirilib. Bu görüşlər zamanı iki ölkə arasında kino sahəsində əlaqələrin inkişaf etdirilməsi məsələləri müzakirə edilib, müştərək film layihələrinin reallaşdırılması istiqamətində danışıqlar aparılıb.
Mühüm görüşlərdən biri də Ümumrusiya Dövlət Kinematoqrafiya Universitetinin (VGİK) rəhbərliyi ilə oldu. Kino təhsili ilə bağlı ilkin müzakirələr və fikir mübadiləsi aparıldı. Düşünürəm ki, yaxın müddətə bu danışıqların real nəticələrini görə biləcəyik.
“AZƏRTAC haqqında film çəkmək həm vacib, həm də məsuliyyətlidir”
-AZƏRTAC haqqında film üzərində işləyirsiniz. Bu ideya necə yarandı, çəkilişləri hansı mərhələdədir?
-Bildiyiniz kimi, hər hansı bir film layihəsinin əsas hissəsi onun hazırlıq dövrüdür. Xüsusilə də bu sənədli filmdirsə, mövzu ilə bağlı ciddi araşdırmalar aparılması, əldə edilən materialların filmdə hansı formada istifadə olunması barədə qərarların verilməsi filmin gələcək uğuru üçün vacib addımdır.
Bir əsrdən çox yaşı olan Azərbaycan Dövlət İnformasiya Agentliyi ölkəmiz üçün mühüm missiyaları yerinə yetirən bir qurumdur. Bu missiya bir əsrlik tarixi boyu davam edib. İdeya da məhz bundan qaynaqlanır. Hazırda informasiya dövründə yaşayırıq və informasiya agentliyinin cəmiyyət qarşısındakı öhdəlikləri danılmazdır. Bu qurum haqqında film çəkmək həm vacibdir, həm də məsuliyyətli. Filmin ilkin hazırlıq dövrü tamamlandıqdan sonra ekran işi haqqında geniş informasiya elə AZƏRTAC vasitəsilə və ictimaiyyətə çatdırılacaq. Güman edirik ki, AZƏRTAC-ın adına yaraşan, sanballı bir ekran işi ərsəyə gələcək.
Fəridə Abdullayeva
AZƏRTAC-ın xüsusi müxbiri
Moskva