AZƏRTAC xəbər verir ki, noyabrın 12-də Fövqəladə Hallar Nazirliyinin yeni istifadəyə verilmiş inzibati binasının açılışı olmuşdur. Azərbaycan Prezidenti İlham Əliyev mərasimdə iştirak etmişdir.

Fövqəladə hallar naziri, general-polkovnik Kəmaləddin Heydərov Azərbaycan Prezidenti, Silahlı Qüvvələrin Ali baş komandanı İlham Əliyevə raport verdi.

Dövlətimizin başçısı inzibati binanın foyesində ümummilli lider Heydər Əliyevin büstünə baxdı, ulu öndərin müxtəlif illərdə baş vermiş fövqəladə hallar zamanı fəaliyyətini əks etdirən fotostendlə, nazirliyin əməkdaşlarına xidmət göstərəcək və müasir avadanlıqla təchiz olunmuş tibb məntəqəsi ilə tanış oldu.

Sonra Prezident İlham Əliyev nazirliyin Böhran Vəziyyətində İdarəetmə Mərkəzinin işi ilə yaxından tanış olmaq üçün “Əməliyyat otağı”na gəldi. Dövlətimizin başçısına məlumat verildi ki, “Əməliyyat otağı” 24 saat ərzində “112 zəng mərkəzi”ndən, hüquq mühafizə orqanlarının əməliyyat növbətçilərindən, müxtəlif orqanların növbətçi-dispetçer xidmətlərindən fövqəladə hadisələrlə bağlı məlumatları qəbul edir. Hadisə yerinə ən yaxın qüvvə və vasitələr müəyyən edildikdən sonra onların hadisə rayonuna göndərilməsi təmin olunur. Nazirliyin qəza-xilasetmə birləşmələrinin qüvvə və vasitələrinin mərkəzləşdirilmiş qaydada idarə edilməsi də buradan həyata keçirilir. “Əməliyyat otağı”nda gün ərzində 7 zabit növbədə olur. Əməliyyat növbətçiləri mərkəzə daxil olan məlumatların qəbulu və mərkəzdən verilən göstərişlərin müvafiq olaraq çatdırılması, habelə fövqəladə hadisə barədə rəhbər şəxslərin və qurumların məlumatlandırılmasını təmin edirlər.

Dövlətimizin başçısı elektron xəritə ilə də tanış oldu. Xəritədə Azərbaycanın bütün yaşayış məntəqələri, avtomobil yolları, su anbarları, çaylar, kanallar, bir sözlə, bütün strateji obyektlər yerləşdirilmişdir. Bu xəritədə regional mərkəzlərin ərazisindəki qüvvə və vasitələrin, həmin regionda olan məktəb, xəstəxana binalarının yerlərini və sayını da müəyyən etmək mümkündür.

Burada həm də ilk dəfə olaraq, yanğın-xəbərdarlıq sisteminin siqnallarının qəbuluna da başlanılmışdır.

Bu sistem ABŞ-ın “AES-İntelliNet” şirkətinin məhsuludur və dünyada “Meş” texnologiyaya əsaslanan yeganə təhlükəsizlik sistemidir. Sistemin proqram təminatı isə yerli mütəxəssislər tərəfindən işlənilmişdir. Sistem yanğın haqqında məlumatı mərkəzə ötürən kimi həyəcan siqnalı ilə yanaşı, həmin obyekt barədə məlumatlar ekrana daxil olur.

Prezidentə məlumat verildi ki, Mərkəzin yaradılmasında dünyanın ən qabaqcıl təcrübəsi geniş şəkildə öyrənilib, mükəmməl və müasir texnologiyalara əsaslanan bu sistem yaradılıbdır.

Elektron xəritə əsasında sistemlə tanışlıqdan sonra dövlət başçısı binanın 12-ci mərtəbəsində yerləşən “Böhran vəziyyətlərində idarəetmə zalı”na gəldi. Bu zal irimiqyaslı təbii və texnogen fövqəladə halların qarşısının alınması və onların nəticələrinin aradan qaldırılmasına cəlb edilən qüvvələrin səmərəli idarə olunması üçün nəzərdə tutulmuşdur. Böhran vəziyyətlərində idarəetmə zamanı birgə fəaliyyət üçün nazirliyin qurum rəhbərləri və digər dövlət qurumlarının nümayəndələri üçün 16 iş yeri yaradılmışdır. Hadisə rayonunun interaktiv və vizual görüntülərini izləmək məqsədi ilə zalda 5,3 metr diaqonallı ekran quraşdırılmışdır. Bakı şəhəri ərazisində hər hansı bir hadisənin operativ görüntülərini izləmək məqsədi ilə müxtəlif yerlərdə xüsusi kameraların quraşdırılması nəzərdə tutulur. İndiyədək səkkiz kamera quraşdırılmışdır. Böyük Britaniyanın “İndiqovijin” şirkətinin istehsalı olan kameralar hər hansı obyekti 36 dəfə optik, 12 dəfə isə rəqəmsal yaxınlaşdırmaq və 360 dərəcə üfüqi, 90 dərəcə isə şaquli dönmək xüsusiyyətlərinə malikdir.

Zaldan birbaşa nazirliyin tabeliyində olan bir neçə qurumlar ilə “video-konfrans” əlaqəsi yaradıldı. Yasamal rayonu ərazisində tikintisi yarımçıq qalmış çoxmərtəbəli binada “şərti partlayış” nəticəsində baş vermiş yanğın zamanı nazirliyin müvafiq xilasetmə qurumlarının həyata keçirdikləri taktiki təlim birbaşa nümayiş etdirildi. Dövlət Yanğından Mühafizə Xidmətinin və digər qurumların hissələri müasir texnika və xilasetmə avadanlıqlarından məharətlə istifadə edərək, “yanğının” qarşısının alınması və xilasetmə tədbirlərinə başladılar.

Daha sonra Bakı buxtasında Fövqəladə Hallar Nazirliyinin müvafiq xilasetmə qurumları ilə həyata keçirdikləri taktiki təlim nümayiş etdirildi. Burada dalğıc-xilasedicilərin vəzifəsi neftdaşıyan tankerdə “partlayış” nəticəsində baş vermiş yanğını aradan qaldırmaqdan və insanları xilas etməkdən ibarət idi. Qısa vaxt ərzində katerlərlə və aviasiya dəstəsinin Mİ-17-1V vertolyotları ilə hadisə yerinə çatmış dalğıc-xilasedicilər sudakı insanların axtarış və xilasetmə işlərinə başladılar. Yanğınsöndürmə gəmisi yaxınlaşaraq, “yanan” gəmiyə bir neçə istiqamətdən odsöndürücü maddə vurdu. BE-200 ÇS tipli amfibiya təyyarəsinin bortundakı su ilə isə yanğının söndürülməsi əməliyyatı aparıldı. Xəzər Hövzə Qəza-Xilasetmə Xidmətinin xüsusi “ARKTUR” kateri ilə isə dağılmış neftin suyun üzərindən yığılması üçün bon çəpəri açıldı. 

Görülən “xilasetmə” tədbirləri nəticəsində hər iki əməliyyat müvəffəqiyyətlə başa çatdırıldı.

Fövqəladə hallar naziri, general polkovnik KƏMALƏDDİN HEYDƏROV nazirliyin fəaliyyətinə yaratdığı yüksək şəraitə, göstərilən diqqət və qayğıya görə Prezident, Ali baş komandan İlham Əliyevə minnətdarlığını bildirdi:

-Bütün şəxsi heyət adından Sizə təşəkkürümüzü bildiririk. Təkcə nazirliyin şəxsi heyəti deyil, hamı görür, statistika, rəqəmlər də göstərir ki, Sizin gördüyünüz tədbirlər, əhalinin mülki müdafiəsinə qayğınız nəticəsində qəzaların sayı nə qədər azalmışdır. Qəzalar sahəsində baş verən ölüm hadisələrinin sayı nə qədər azalmışdır. Əhalinin əmlakının xilas edilməsində nə qədər irəliləyiş olmuşdur. Bütün bunlara görə Sizə dərin təşəkkürümüzü, bizə göstərdiyiniz şəxsi qayğıya görə minnətdarlığımızı bildiririk.

İLHAM ƏLİYEV: Sağ olun. Mən çox şadam ki, Fövqəladə Hallar Nazirliyi yaranandan sonra qısa müddət ərzində çox böyük işlər görüldü. Azərbaycanda təhlükəsizliyin təmin olunmasında, xilasetmə işlərinin düzgün qurulmasında çox böyük işlər görülmüşdür. Bu gözəl binanın tikintisi və Fövqəladə Hallar Nazirliyinin sərəncamına verilməsi də göstərir ki, Azərbaycan dövləti bu sahəyə çox böyük diqqət yetirir. İnsanların təhlükəsizliyi və mümkün olan xoşagəlməz hadisələrin qarşısının alınması, təbii fəlakətlərin nəticələrinin aradan qaldırılması üçün Azərbaycan dövləti nə lazımdırsa edəcəkdir. Fövqəladə Hallar Nazirliyinin yeni müasir texnika ilə təchizatı da davam edir. Göstərilən təlimlərdə iştirak edən bütün texnikalar, demək olar, son müddət ərzində alınıb, ən müasir standartlara cavab verir. Əlbəttə ki, ən müasir standartlara cavab vermək üçün gələcək illərdə də bütün Azərbaycan üzrə ən qabaqcıl texnologiyalar, ən mütərəqqi metodlar tətbiq olunmalıdır. Dünyada hansı qabaqcıl texnologiya varsa, o, Azərbaycanda bütün sahələrdə tətbiq edilməlidir. O cümlədən, Fövqəladə Hallar Nazirliyinin uğurlu fəaliyyəti üçün onun maddi-texniki bazası daha da möhkəmlənməlidir. Demək olar ki, texnikanın böyük hissəsi alınıbdır. Ancaq növbəti illərdə artıq nəinki Bakıda və başqa böyük şəhərlərdə, bütün bölgələrdə, bütün rayonlarda ən müasir avadanlıq olmalıdır. Növbəti vəzifə Böhran Mərkəzinin yaradılmasıdır. Bunun üçün biz gərək əlavə tədbirlər görək. Elə etməliyik ki, istənilən xoşagəlməz hadisənin qarşısının alınması, profilaktik işlərin təmin olunması və nəticələrin aradan qaldırılması üçün ən qısa müddət ərzində tədbirlər görülsün. Sizi əldə edilmiş uğurlar münasibətilə təbrik edirəm. Gözəl binanın açılışı münasibətilə təbrik edirəm və sizə və bütün şəxsi heyətə yeni uğurlar arzulayıram.

X X X

Azərbaycan Prezidenti İlham Əliyev əhalinin maarifləndirilməsi məqsədi ilə nazirliyin yeni inzibati binasında yaradılmış müasir texniki avadanlıqla, multi-media mərkəzi ilə də tanış oldu. Burada fövqəladə hadisələr zamanı mülki əhalinin vəziyyətdən çıxmaq üçün necə hərəkət etməsi, davranış qaydaları ilə əlaqədar xüsusi videomateriallar hazırlanaraq, təhsil və sənaye müəssisələrində nümayiş etdiriləcəyi bildirildi.

Dövlətimizin başçısı nazirliyin yeni iclas salonuna da baxdı.

Daha sonra Prezident İlham Əliyev fövqəladə hallar zamanı hadisə yerində böhranları idarə etmək üçün nəzərdə tutulan mobil qərargahla - avtobusla da tanış oldu. Avtobus ən müasir rabitə sistemləri ilə təchiz olunmuş, burada ultraqısa və qısa dalğalı rəqəmsal və analoq radiostansiyalar, eləcə də nazirliyin müvafiq qurumları ilə “video-konfrans” əlaqəsi yaratmaq üçün müvafiq avadanlıq quraşdırılmışdır.

Fövqəladə Hallar Nazirliyinin ən müasir standartlara uyğun şəkildə tikilib istifadəyə verilmiş yeni inzibati binası və buradakı müasir texniki təchizatla tanışlıq razılıq doğurdu. 

######