Firdovsi Əliyev: Meşələrin mühafizəsi üçün beş rayonda kameralar quraşdırılıb
Bakı, 27 dekabr, AZƏRTAC
Dekabrın 27-də Ekologiya və Təbii Sərvətlər Nazirliyində qeyri-hökumət təşkilatlarının və KİV-lərin nümayəndələri ilə “Ekoloji gündəm medianın və ictimaiyyətin baxış prizmasında: ətraf mühit sahəsində görüləcək işlər və təhlillər” mövzusunda dialoq təşkil olunub.
AZƏRTAC xəbər verir ki, görüşdə əhalini narahat edən həlli vacib ekoloji problemlərin aradan qaldırılması üçün nazirlik tərəfindən müəyyənləşdirilmiş prioritet istiqamətlər, onların həlli yolları, bu işdə ictimaiyyətin və medianın iştirakı, qarşılıqlı əməkdaşlıq məsələləri müzakirə edilib.
Ekologiya və təbii sərvətlər nazirinin müavini Firdovsi Əliyev bu il keçirilən ağacəkmə aksiyalarında təkcə Bakıda və Abşeron yarımadasında 100 minə yaxın ağac əkildiyini deyib. Əlavə edib ki, payız ağacəkmə aksiyaları çərçivəsində ümumilikdə bir milyona yaxın ağac əkilib.
Meşələrin mühafizəsi istiqamətində görülən işlərdən danışan nazir müavini deyib ki, 5 rayonda - Zaqatala, Oğuz, Qəbələ, Şəki, Qaxda meşələrə 24 saat fəaliyyət göstərən kameralar quraşdırılıb. İyirmi min hektara yaxın ərazini əhatə edən kameralar vasitəsilə 1650 metrdən hədəfi görmək mümkündür. Onlayn rejimdə Günəş batareyaları ilə işləyən kameralar vasitəsilə qanunsuz ağac kəsilməsi ilə yanaşı, meşə yanğınlarının da qarşısı alına bilər. Gələcəkdə kameraların digər bölgələrdə də quraşdırılması və operator mərkəzinin yaradılması nəzərdə tutulub.
Nazir müavini hər kəsi ətraf mühitin mühafizəsinə diqqətli yanaşmağa və ağacəkmə aksiyalarında fəal iştirak etməyə çağırıb.
Nazirliyin aparat rəhbəri Vüqar Kərimov daş karxanaları və iaşə obyektlərində müasir qurğuların quraşdırılması istiqamətində işlərin davam etdiyini və monitorinqlərin aparıldığını diqqətə çatdırıb: “Bu il 307 restoran və iaşə obyektində müasir qurğular quraşdırılıb. Qaydalara əməl etməyən, qurğular quraşdırmayan iaşə obyektlərindən 43-ü məhkəməyə verilib, üç restoranın fəaliyyəti dayandırılıb. Daş karxanaları da qoyulan qaydalara əməl etməli, ətraf mühitin çirklənməsinə səbəb olmamalıdırlar”.
Neftlə və digər zərərli maddələrlə çirklənmiş ərazilərin təmizlənməsi məsələsinə də toxunan aparat rəhbəri Abşeron yarımadasında belə ərazilərin qiymətləndirilməsinə dair sənəd layihəsinin hazırlanacağını deyib. Sənədin gələn il yayda ictimaiyyətə təqdim olunması gözlənilir. Burada əsas məqsəd növbəti 5 il ərzində çirklənmiş ərazilərin böyük qisminin təmizlənməsi, torpaqların dövriyyəyə qaytarılmasıdır. Təmizlənmiş ərazilər müxtəlif məqsədlər üçün istifadə olunacaq. Gələn il çirklənmiş əraziləri əhatə edən xəritə də hazırlanacaq.
Nazirliyin ekoloji maarifləndirmə və ictimaiyyətlə əlaqələr şöbəsinin müdiri Səyyarə Məmmədova plastik tullantıların çeşidlənməsi, plastik qablaşdırmadan tədricən imtina edilməsinə dair təbliğat kampaniyaları barədə məlumat verib. O bildirib ki, hazırda plastik tullantıların toplanması üçün 37 şəhər və rayonda 145-dək konteyner quraşdırılıb.
Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktoru Hikmət Əlizadə ekoturizmin inkişafı ilə bağlı yeniliklərdən, ovçuluq qaydalarının təkmilləşdirilməsindən danışıb: "Bu il ötən illərə nisbətən qanunsuz ov hallarına daha çox rast gəlinib. Ölkəmizdə qanunsuz ovla məşğul olan 200-dən çox yerli, 20-dək xarici vətəndaş saxlanılıb. Bununla yanaşı, son zamanlar qanunsuz şəkildə ovlanan heyvanlar restoranlara satılır. Həmin restoranlar da brakonyerlər kimi cəzalandırılacaq. Bununla bağlı Qida Təhlükəsizliyi Agentliyi ilə anlaşma memorandumu imzalamışıq. Çünki restoranlara verilən ətlərin mənşəyi naməlumdur".
Hidrometeorologiya Elmi Tədqiqat İnstitutunun direktor müavini Rafiq Verdiyev hidrometeoroloji sahədə tətbiq ediləcək yeniliklər barədə ətraflı məlumat verib. O bildirib ki, proqnozların dəqiqliyinin artırılması üçün yeni radarların alınması nəzərdə tutulub.
Sonra kütləvi informasiya vasitələri nümayəndələrini maraqlandıran suallar cavablandırılıb, ekoloji məsələlərin həllində ictimaiyyətin və medianın rolu barədə fikir mübadiləsi aparılıb.
Bölmənin digər xəbərləri
