Fransa bankları Amazon meşələrinin qırılmasını maliyyələşdirməkdə ittiham olunur
Paris, 21 noyabr, AZƏRTAC
COP30 çərçivəsində “Reclaim Finance” və “Canopee” adlı iki QHT Fransanın bank sektoruna qarşı ağır ittihamlar irəli sürüb. Bildirilib ki, “BNP Paribas”, “BPCE”, “Credit Agricole” və “Societe Generale” Amerika Birləşmiş Ştatlarının kənd təsərrüfatı nəhəngləri olan “Bunge” və “Cargill” ilə milyardlarla dollarlıq əməliyyatlarda iştirak etməklə, dolayı yolla Amazondakı meşələrin qırılmasını maliyyələşdirir.
AZƏRTAC xəbər verir ki, QHT-lərin hesabatına əsasən, Fransanın bu 4 bankı 2024-cü il yanvarın əvvəlindən 2025-ci il avqustun sonunadək ABŞ şirkətləri ilə birlikdə 10 milyard dollar dəyərində maliyyə əməliyyatlarında iştirak edib.
“Fransa bankları Amazonda meşələrin qırılmasına göz yumur. İqlim böhranı fonunda onların bu təsiri görməsi və ciddi öhdəliklər götürməsi vacibdir”, - deyə “Reclaim Finance”ın analitiki Andrea Hernandez bildirib.
Hesabatın hazırlanması zamanı QHT-lər peyk vasitəsilə torpağın monitorinqini aparan “MapBiomas” şəbəkəsinin dərc etdiyi meşələrin qırılmasının əks olunduğu xəritələri “Bunge” və “Cargill” şirkətlərinin Braziliya kadastrlarında qeyd olunan anbarları ilə müqayisə ediblər. Nəticələr Amazon meşələrinin məhv edilməsinin mümkünlüyünü göstərib.
Fransa bankları ittihamlara dərhal reaksiya göstərib.
“BPCE” QHT-lərin hesabatını sərt tənqid edib, müvafiq məlumatları “sübutu olmayan rəqəmlər” adlandırıb. Məsələ ilə bağlı 2025-ci ilin sonunda məlumatın dərc ediləcəyi diqqətə çatdırılıb.
“Societe Generale” isə Cənubi Amerikada soya təchizat zəncirində fəaliyyət göstərən şirkətlər üçün konkret istisna meyarlarının mövcud olduğunu vurğulayıb.
Bölmənin digər xəbərləri
