Fransa gəmisi “qaranlıq keçid” üsulu ilə növbəti dəfə Hörmüz boğazından keçib
Bakı, 7 may, AZƏRTAC
Fransanın “CMA CGM SA” şirkətinə məxsus “CMA CGM Saigon” adlı konteyner gəmisi Hörmüz boğazından keçə bilib.
AZƏRTAC xarici mediaya istinadla xəbər verir ki, “CMA CGM Saigon” fevralın sonlarında İran-ABŞ müharibəsinin başlamasından bəri Hörmüz boğazından keçən Qərbi Avropa ilə əlaqəli nadir gəmidir. Gəminin bölgədəki radarlardan yayınmaq üçün transponderləri söndürərək hərəkət etdiyi bildirilir.
Gəmi izləmə məlumatlarına görə, 1700 TEU tutuma malik “CMA CGM Saigon” gəmisi mayın 5-də Birləşmiş Ərəb Əmirlikləri (BƏƏ) sahillərində görüldükdən sonra radarlardan itib. Gəmi mayın 7-də Oman sahillərində yenidən siqnal verib və Şri-Lankadakı Kolombo limanına hərəkət etdiyini təsdiqləyib.
Dənizçilik mütəxəssislərinin fikrincə, qlobal ticarət üçün əsas bölgə olan Hörmüz boğazı son aylarda ən sirli və uğurlu dəniz əməliyyatlarından birinə şahid olur. Transponderləri söndürmək gəmilərin boğazdakı blokadanı keçmək üçün istifadə etdiyi əsas metoddur. Gəmilərin yerlərini gizlətmək üçün transponderlərini söndürdüyü bu üsul “qaranlıq keçid” adlanır. Bölgədə təkcə fiziki blokadanın olmadığı, həm də intensiv siqnal maneələrinin gəmi hərəkətini izləməyi demək olar ki, qeyri-mümkün etdiyi bildirilir.
Qərbi Avropamənşəli gəmilərin əksəriyyəti müharibənin əvvəlindən bəri bölgədən uzaqda qalsa da “CMA CGM Saigon” aprelin əvvəlində də oxşar əməliyyatı uğurla həyata keçirib.
Bölmənin digər xəbərləri
