FRANSA VƏ ALMANİYA AZƏRBAYCANDAKI DEMOKRATİK VƏ İQTİSADİ İSLAHATLARI HƏMİŞƏ DƏSTƏKLƏYƏCƏKLƏR
Fransanın və Almaniyanın Bakıdakı səfirləri, xanım Şantal Puare və cənab Klaus Qrevlix fevralın 20-də Fransa səfirliyində Azərbaycanla bu ölkələr arasında diplomatik münasibətlər qurulmasının onuncu ildönümünə həsr olunmuş mətbuat konfransı keçirmişlər.
Xanım Puare demişdir ki, Almaniya ilə Azərbaycan arasında diplomatik münasibətlər fevralın 20-də, Fransa ilə isə fevralın 21-də qurulmuşdur və birgə mətbuat konfransı keçirilməsinin səbəbi də budur.
Diplomatlar bildirmişlər ki, onların ölkələri Azərbaycan müstəqillik əldə etdikdən sonra burada aparılan demokratik və iqtisadi islahatları dəstəkləyir. Azərbaycanın üzv olduğu Avropa Şurası da belə mövqe tutur.
Səfirlər Azərbaycanla iqtisadi əməkdaşlığın səviyyəsindən razı olduqlarını bildirmişlər. Fransa Azərbaycan iqtisadiyyatına investisiya qoyulmasının səviyyəsinə görə xarici ölkələr arasında aparıcı yer tutur. Bu ilin yazında Almaniya və Fransa biznesmenlərinin mötəbər nümayəndə heyətlərinin Azərbaycana səfəri gözlənilir. Onlar azərbaycanlı həmkarları ilə əməkdaşlıq imkanlarını öyrənəcəklər. Fransanın işgüzar dairələri Azərbaycan üçün ənənəvi olan neft və energetika sektoru ilə yanaşı, kənd təsərrüfatı sahəsində də qarşılıqlı əlaqələrin genişləndirilməsinə maraq göstərirlər.
Ermənistan-Azərbaycan münaqişəsinin nizama salınması məsələsində Fransanın rolu haqqında suala cavabında xanım Puare demişdir ki, onun ölkəsi məsələnin sülh yolu ilə həllinə tərəfdardır.
Bölmənin digər xəbərləri
