Fransada dövlət vəsaitindən Makronun əleyhdarlarına qarşı istifadə edilib
Paris, 17 aprel, AZƏRTAC
Fransada Respublika naminə Marian Fondu (Fonds Mariannepour la Republique) məsələsi getdikcə daha da qabarır. 2021-ci ildə vətəndaşlıq məsələləri üzrə nazir Marlen Şiappa (Marlene Scjiappa) tərəfindən respublika dəyərlərinin təbliğ etmək və gənclər arasında separatçı çıxışlara qarşı mübarizə aparmaq üçün yaradılmış və dövlət tərəfindən maliyyələşmiş assosiasiyanın fəaliyyətində qaranlıq məqamlar aşkarlanıb.
AZƏRTAC xəbər verir ki, respublika dəyərlərini təbliğ etmək və separatçı çıxışlara qarşı, xüsusilə də sosial şəbəkələrdə və onlayn platformalarda mübarizə aparmaq üçün insanları və assosiasiyaları maliyyələşdirmək məqsədilə dövlət Respublika naminə Marian Fonduna 2,5 milyon avro köçürüb.
Separatçılığa qarşı mübarizə pərdəsi altında Fond pullarının prezident və parlament seçki kampaniyaları zamanı Emmanuel Makronun əleyhdarlarına qarşı siyasi məzmunlu təbliğata sərf edildiyi üzə çıxıb. Marianne jurnalı və France 2 telekanalının birgə araşdırmasına görə, dövlət vəsaitindən bəhrələnənlərin siyahısı gizli saxlanılıb.
Hüquq pozuntularının və radikallaşmanın qarşısının alınması üzrə Nazirliklərarası Komitənin (CIPDR) rəhbəri Kristian Qravel də bəzi təbliğat mətnlərində siyasi istinadlar olduğunu bildirib. Beləliklə, Marian Fonduna verilən subsidiyalar əslində Emmanuel Makrona müxalif olanlara qarşı təbliğata yönəldilib.
İnzibati təftiş və prokurorluq məsələ ilə bağlı araşdırmaya başlayıb.
AZƏRTAC-ın xüsusi müxbiri
Bölmənin digər xəbərləri
