Fransanın "Libération" qəzeti Azərbaycan torpaqlarının işğalından yazıb
Bakı, 30 mart, AZƏRTAC
Fransanın “Libération” qəzetində Ermənistan-Azərbaycan münaqişəsi ilə bağlı yazı dərc edilib. Yazının müəllifi “Paris Azərbaycan Evi”nin rəhbəri, Azərbaycanın Dostları Assosiasiyasının baş katibi Mirvari Fətəliyevadır.
Diasporla İş üzrə Dövlət Komitəsinin mətbuat xidmətindən AZƏRTAC-a verilən məlumata görə, məqalədə iki ölkə arasında olan mövcud əlaqələrdən, ölkəmizin iqtisadi inkişafından, Ermənistan-Azərbaycan, Dağlıq Qarabağ münaqişəsindən və Xocalı soyqırımından bəhs olunur. Bildirilir ki, Prezident İlham Əliyevin Azərbaycan ilə Fransa arasında diplomatik əlaqələrin qurulmasının 25 illiyinə təsadüf edən səfəri münasibətlərin dinamik inkişafını təsdiq edir.
Fransanın Azərbaycanın müstəqilliyini tanıyan ikinci ölkə olduğunu vurğulayan müəllif bu illər ərzində ikitərəfli münasibətlərin inkişafını bir neçə amillə izah edir. Yazıda deyilir: “Bu illər ərzində Fransa və Azərbaycan arasında əlaqələr çox yüksək səviyyədə inkişaf edib. Müstəqilliyini bərpa etdikdən sonra Azərbaycan hüquqi dövlət qurmaq siyasəti yürüdüb, əhəmiyyətli iqtisadi, siyasi və institusional islahatlar həyata keçirib, modernləşən, gənc demokratik, dinamik bir dövlətə çevrilib. 1998-ci ildə ölüm cəzası ləğv edilib. Dini azadlıqların qorunması istiqamətində mühüm işlər görülüb. Azərbaycanda şiə və sünni müsəlmanlar, xristianlar, yəhudilər qarşılıqlı hörmətlə yaşayırlar, ölkədə tolerantlıq, dünyəvilik kimi ənənələr inkişaf edib. Bu günə qədər erməni əsilli təxminən 30 min vətəndaş Ermənistanla münaqişəyə baxmayaraq, Bakıda və digər şəhərlərdə təhlükəsiz yaşayırlar”.
Yazıda Azərbaycan dövlətinin düşünülmüş və balanslı xarici siyasətinə diqqət çəkilir, Ermənistan-Azərbaycan münaqişəsi haqda ətraflı məlumat verilir. Məqalədə deyilir: “Dağlıq Qarabağ münaqişəsi bu gün həll olunmamış qalır. Ermənistan və Azərbaycan arasında 1988-ci ildən 1994-cü ilədək davam edən toqquşmalar Azərbaycan torpaqlarının 20 faizinin işğalı, eyni zamanda, bir milyondan çox azərbaycanlının qovulması ilə nəticələnib. Azərbaycan dünyada adambaşına düşən qaçqınların və məcburi köçkünlərin sayına görə birinci ölkədir”. Xocalı soyqırımından bəhs edən müəllif bildirir ki, 1992-ci il fevralın 26-da bu faciə nəticəsində əksəriyyəti qadınlar, uşaqlar və qocalar olmaqla 613 dinc sakin vəhşicəsinə qətlə yetirilib. Ermənistanın indiki prezidenti Serj Sarkisyan Xocalı soyqırımının törədilməsi ilə bağlı əmr verdiyini qərbli jurnalistlərə müsahibəsində açıq şəkildə etiraf edib.
Məqalədə münaqişənin həlli ilə bağlı BMT Təhlükəsizlik Şurasının dörd qətnaməsinin hələ də icra olunmadığı vurğulanır. Bu qətnamələrdə Azərbaycana qarşı gücdən istifadə olunması və bu ölkənin torpaqlarının işğalı pislənilir. Azərbaycanın suverenliyi və ərazi bütövlüyü bir daha dəstəklənir. Bu sənədlər işğalçı qüvvələrin Azərbaycan torpaqlarında dərhal, tam və qeyd-şərtsiz çıxarılmasını tələb edir. “Biz ATƏT-in Minsk qrupunun həmsədr ölkələrindən biri kimi, Fransanı və beynəlxalq ictimaiyyəti bu təcavüzə reaksiya verməyə çağırır, Azərbaycanın ərazi bütövlüyünün sülh yolu ilə bərpa edilməsində bizə dəstək olmağa səsləyirik”,- deyə müəllif vurğulayıb.
Bölmənin digər xəbərləri
