Fransanın xeyriyyə assosiasiyası: Ölkədə əhalinin 15 faizi yoxsulluq şəraitində yaşayır
Paris, 20 noyabr, AZƏRTAC
“Restos du cœur” xeyriyyə assosiasiyası Fransada yoxsulluğun rekord səviyyəyə çatdığı barədə xəbərdarlıq edib. Əhalinin 15 %-i yoxsulluq şəraitində yaşayır.
AZƏRTAC xəbər verir ki, “Restos du cœur” xeyriyyə Assosiasiyasının sözçüsü İv Meriyon noyabrın 18-də “Franceinfo”ya açıqlamasında ölkədə yoxsulluq göstəricilərinin indiyə qədər görünməmiş səviyyəyə yüksəldiyini bildirib. Onun sözlərinə görə, hazırda fransızların 15 %-dən çoxu yoxsulluq həddinin altında yaşayır. Bu isə ölkə üçün tarixi rekorddur. On iki ildir könüllü kimi fəaliyyət göstərən Meriyon artan yoxsulluğu bir-birini izləyən böhranların nəticəsi kimi dəyərləndirir. O qeyd edir ki, xüsusilə Ukrayna müharibəsindən sonra inflyasiyanın kəskin yüksəlişi bir çox ailələrin büdcəsini çökdürüb. “Gördüyümüz ailələrin 42 %-i kirayə və kommunal xərcləri ödədikdən sonra ayın sonuna qədər xərcləməyə bircə avroları belə qalmır”, – deyə Meriyon bildirib. Bu, təşkilatın qış ərzaq yardımı kampaniyasına başladığı bir dövrdə baş verir və artan müraciətlərə cavab vermək üçün “Restos du cœur” yardım meyarlarını sərtləşdirməyə məcbur olub. Artıq yardım üçün uyğunluq ailələrin qaçılmaz xərclərini ödədikdən sonra əlində qalan məbləğə, yəni qalıcı gəlir səviyyəsinə əsasən müəyyən edilir.
Təşkilatın müşahidələrinə görə, yardım alanların profili də dəyişir və getdikcə cavanlaşır. “Yardım etdiyimiz insanların yarısı 25 yaşdan aşağıdır”, – deyə Meriyon qeyd edir. Bu qrupun daxilində təqaüdsüz və maddi çətinlik çəkən tələbələr, ailələri ilə birlikdə gələn uşaqlar, az gəlirli gənc işçilər yer alır. Onların çoxu qeyri-sabit məşğulluq, güvənsiz yaşayış şəraiti və sosial təcrid kimi problemləri eyni anda yaşayır. Xüsusilə təkvalideynli ailələr – əsasən təkbaşına uşaqlarını böyütməyə çalışan analar – daha çox risk altındadır. Bəzi analar uşaqlarını doyurmaq üçün özləri yeməksiz qalmaq məcburiyyətində olduqlarını etiraf edirlər.
Meriyon bildirir ki, yoxsulluq yalnız böyük şəhərlər üçün xarakterik deyil. Regionlar arasında fərqlər olsa da, həm şəhər, həm də kənd yerlərində yardım alanların əksəriyyəti eyni problemlərlə – işsizlik, yaşayış çətinliyi və sosial hüquqlara çıxışın məhdudluğu ilə üzləşir. O, bunu çoxqatlı qeyri-sabitlik adlandırır.
“Restos du cœur” bu gün Fransanın ən zəif durumda olan vətəndaşları üçün dəstəyə çevrilib. Meriyon cəmiyyətin bu vəziyyətə uzunmüddətli həll tapa bilməməsini ictimai uğursuzluq kimi qiymətləndirir. Lakin o, buna baxmayaraq, insanlıq adına bir ümid işığı gördüyünü bildirir. Bu xəbərdarlıq ölkədə sosial narazılığın artdığı və getdikcə daha çox insanın əsas ehtiyaclarını ödəməkdə çətinlik çəkdiyi bir vaxtda səslənir.
Bölmənin digər xəbərləri
