GƏMİÇİLİYİN TƏŞƏKKÜL TAPMASI VƏ İNKİŞAFI PREZİDENT HEYDƏR ƏLİYEVİN ADI İLƏ BAĞLIDIR
Mərasimdə çıxış edən XDG-nin rəisi Aydın Bəşirov son illər gəmiçilikdə görülən işlər və donanmanın yeniləşdirilməsi istiqamətində atılan addımlar barədə məlumat vermiş, qurumun son 30 ildən artıq bir müddətdəki inkişafında dahi rəhbərimiz Heydər Əliyevin həyata keçirdiyi uzaqgörən siyasətdən, göstərdiyi məqsədyönlü səylərdən və bu işlərin Prezident İlham Əliyev tərəfindən uğurla davam etdirilməsindən danışmışdır.
Gəmiçiliyin yüksələn xətlə inkişaf etdiyini bildirən Aydın Bəşirov qeyd etmişdir ki, iqtisadiyyatımızın dirçəlməsində önəmli rolu olan qurumun yaşaması və fəaliyyəti Prezident Heydər Əliyevin adı ilə bağlıdır. Nəqliyyatın ən çətin sahəsi sayılan gəmiçilikdə çalışanlar ulu öndərimizin diqqət və qayğısının bəhrəsini bu gün də hiss edirlər. Dənizçilərin peşə bayramı məhz dahi rəhbərimizin müvafiq sərəncamı ilə təsis olunmuş və artıq altıncı ildir ki, iyul ayının birinci istirahət günü qeyd olunur.
Son illər alınmış yeni gəmi və tankerlərin istismara buraxılması nəticəsində daşımaların həcminin sürətlə artdığını deyən natiq bildirmişdir ki, gəmiçiliyin donanması bu il 13 milyon 268 min ton yük daşıyaraq rekord nəticə əldə etmişdir. Növbəti illərdə daşımaların həcmini 15 milyon tona çatdırmaq planlaşdırılır.
Aydın Bəşirovun sözlərinə görə, yeni tankerlər əsasən Qazaxıstan neftini daşımaqla Bakı-Tbilisi-Ceyhan əsas neft ixrac kəmərinin doldurulmasında müstəsna rol oynayacaqdır. Donanmanın yeniləşdirilməsi və görülən digər işlər nəticəsində yeni iş yerlərinin açıldığını deyən natiq əminliklə bildirmişdir ki, gəmiçilik öz mövqelərini bundan sonra da möhkəmləndirəcəkdir.
XDG-nin fəaliyyətinə aid videomaterialın nümayişindən sonra kollektiv adından Prezident İlham Əliyevə müraciət qəbul olunmuşdur.
Mərasim bədii hissə ilə başa çatmışdır.
Bölmənin digər xəbərləri
