Gənc ifaçının uğurlu improvizələri VİDEO
Bakı, 9 iyun, Məmməd Məmmədli, AZƏRTAC
Gənc balabançı Amin Əliyevin ifaları musiqi həvəskarlarının böyük marağına səbəb olub. Onun improvizələri, sənət dünyasında atdığı ilk addımlar melomanlar deyil, musiqiçilər arasında da rəğbətlə qarşılanıb.
AZƏRTAC-ın müxbiri istedadlı gənc ifaçı ilə görüşərək onun sənət uğurları və gələcək planları barədə söhbət edib.
Söhbət əsnasında məlum olub ki, Amin Əliyev əvvəlcə Hüseynqulu Sarabski adına musiqi məktəbinin fortepiano sinfinə daxil olsa da, sonradan balaban ifaçılığına öyrənməyə qərar verib. Daha doğrusu, muğamları yaxşı ifa etdiyinə görə məktəbin direktoru ona balaban alətini seçməyi tövsiyə edib. Bu seçim ona uğur gətirib. Məktəbi fərqlənmə ilə bitirəndən sonra Bakıdakı Georgi Şaroyev adına 35 nömrəli onbirillik musiqi məktəbinə daxil olub. Balabanın sirlərini ona müəllimi Emil Kərimli öyrədib.
Özünün sənət uğurlarından danışan Amin Əliyev deyib: “Məşhur ifaçıları dinlədikdən sonra caz və bluz janrlarını öyrənməyə həvəsim yarandı və tədricən ifalarımda milli musiqi nömrələrini həmin janrlarla sintez etməyə başaldım. Muğamı, daha çox “Segah” və Bayatı-Şiraz”ı sevsəm də, özümü daha çox bluzda ifadə edirəm. “YouTube”da musiqi nümunələrinə qulaq asarkən minusovkalar tapdım və özümü mahnı bəstələməkdə də sınamaq istədim. Açığı, heç özüm də gözləmədiyim halda alındı, özü də çox uğurlu alındı. Mən bluzla muğam arasında bir yaxınlıq, uyarlıq hiss etmişdim. Sonradan gördüm ki, bu janrlar bir-birini çox gözəl tamamlayır. Bizdə sintez olunmuş belə musiqilər yaxşı qəbul olunur. Ancaq digər xalqlarda muğam o qədər də populyar olmadığından yaxşı dərk olunmur. Əlbəttə ki, muğamı anlamaq heç də asan deyil. Zənnimcə, bluz aşıq sənəti, caz isə muğama çox yaxındır”.
İlk dəfə 7 nömrəli musiqi məktəbinin Azərbaycan Dövlət Filarmoniyasında təşkil etdiyi konsertdə çıxış edən həmsöhbətim deyib ki, konsertdə simfonik orkestrin müşayiətlə “Kor ərəbin mahnısı”nı ifa edib. Bu illər ərzində Üzeyir Hacıbəyli adına Dövlət Simfonik Orkestri və Qara Qarayev adına Kamera Orkestrinin müşayiəti ilə bir çox çıxışları olub. Bülbülün anadan olmasının 120 illiyinə həsr olunmuş milli musiqi alətləri ifaçılarının 3-cü müsabiqəsində 3-cü yerə çıxıb. Uşaq və gənclər arasında xalq çalğı alətləri ifaçılarının 4-cü respublika müsabiqəsində isə 1-ci dərəcəli diploma layiq görülüb.
Özünün bəstələrindən ibarət musiqi albomu buraxmaq arzusunda olduğunu söyləyən gənc balaban ifaçısı deyib: “Milli musiqi alətimizdə muğam və aşıq musiqiləri ilə bluz və cazın sintezi çox maraqlı alınır. Ümid edirəm ki, uğurlu sintezlər vasitəsilə milli alətimiz olan balabanı dünyaya tanıtmaq, onun pərdələrindən qopan ecazkar musiqini digər xalqlara da sevdirə biləcəyəm…”
Bölmənin digər xəbərləri
