“Goldman Sachs”: Hörmüz boğazından daşınmaların bərpası gələn ayın sonunadək başa çata bilər
Bakı, 18 iyun, AZƏRTAC
Hörmüz boğazından neft və neft məhsulları daşımalarının ABŞ-İran müharibəsindən əvvəlki səviyyənin yalnız 70 faizinə qədər bərpa oluncağı proqnozlaşdırılır.
AZƏRTAC xəbər verir ki, bu barədə ABŞ-nin qabaqcıl investisiya banklarından olan “Goldman Sachs”ın məlumatında deyilir.
Bildirilir ki, Körfəz ölkələrinin alternativ ixrac marşrutlarına keçməsi bu davamlı azalmada bir amildir. Analitiklərə görə, daşınmaların hazırkı səviyyələrdən bərpası gələn ayın sonuna qədər başa çata bilər. Regionda neft hasilatının oktyabr ayına qədər müharibədən əvvəlki səviyyələrə yaxınlaşacağı gözlənilir.
Müharibədən əvvəl Hörmüz boğazından gündəlik təxminən 20 milyon barel neft və neft məhsulları keçirdi.
“Goldman Sachs”a görə, hazırda Hörmüz boğazından gündəlik təxminən 1,3 milyon barel neft daşınır. Oman körfəzindən əlavə 1,6 milyon barel neft göndərilir. Alternativ marşrutlar vasitəsilə isə gündəlik təxminən 7,5 milyon barel neft daşınır. Dəniz nəqliyyatı tutumunun bərpanı məhdudlaşdıracağı gözlənilməsə də, bəzi gəmi sahiblərinin Hörmüz boğazından tranzitlə bağlı hələ də ehtiyatlı olduqları bildirilir.
Bölmənin digər xəbərləri
