GÖYÇAYDA SOYQIRIMI QURBANLARININ XATİRƏSİ ANILMIŞDIR
Göyçay, 31 mart (AZƏRTAC). 31 mart - Azərbaycanlıların soyqırımı günü Göyçay rayonunda da qeyd olunmuşdur.
Rayon icra hakimiyyətinin nümayəndələri, idarə, müəssisə və təşkilatların kollektivləri, təhsil və səhiyyə işçiləri, gənclər Göyçay şəhərində soyqırımı qurbanlarının xatirəsinə ucaldılmış abidənin önünə əklil və gül-çiçək dəstələri qoymuşlar.
Xatirə kompleksinin ətrafına toplaşan göyçaylılar 1918-ci ildə erməni daşnaklarının törətdikləri qırğınlar zamanı həlak olmuş minlərlə insanın ruhunu bir dəqiqəlik sükutla yad etmişlər.
Toplantıda çıxış edənlər zaman-zaman erməni işğalçıları tərəfindən azərbaycanlılara qarşı məkrli siyasət yeridilməsinə, müxtəlif dövrlərdə torpaqlarımızın zəbt edilməsinə dair çoxsaylı faktlar söyləmişlər. Bildirilmişdir ki, Sovet İttifaqı dövründə 1918-ci ilin mart soyqırımını xalqımıza unutdurmağa çalışmışlar. Yalnız ölkəmiz ikinci dəfə müstəqillik əldə etdikdən sonra ulu öndər Heydər Əliyevin 1998-ci il 26 mart tarixli Fərmanı ilə 31 mart - Azərbaycanlıların soyqırımı günü kimi qeyd edilməyə başlanmışdır.
Anım mərasimində yaşlı nəslin nümayəndələri çıxış edərək gəncləri xalqımızın başına gətirilən müsibətləri, faciələri heç vaxt unutmamağa çağırmışlar.
Azərbaycanlıların soyqırımı günü rayonun idarə, müəssisələrində, ictimai təşkilatlarda, bütün təhsil, səhiyyə və mədəniyyət ocaqlarında qeyd olunmuşdur.
Bölmənin digər xəbərləri
