GÖYÇAYDAKI MADDİ-MƏDƏNİYYƏT NÜMUNƏLƏRİ 1918-Cİ İLDƏ ERMƏNİLƏRİN TÖRƏTDİKLƏRİ VƏHŞİLİKLƏRƏ ŞAHİDLİK EDİR
Göyçay, 31 mart (AZƏRTAC). 1918-ci ildə ermənilər Göyçayda da milli qırğınlar törətmişlər.
Rayonda həmin tarixi yaşadan maddi-mədəniyyət nümunələri mövcuddur. 1918-ci ildə ərazidə baş verən döyüşlər zamanı Boz dağda quraşdırılmış erməni topundan atılan mərmi Göyçay şəhərindəki bir çinarın üstünə düşmüş və ağacı məhv etmişdir. Lakin buna baxmayaraq çinar yenidən boy atmış və bir gövdədən 4 budaq çıxmışdır. İndi həmin budaqların hər biri böyük bir ağacı xatırladır.
Bu gün Göyçayda belə bir deyim var: “Ermənilər xalqımızın oğul və qızlarını qırdılar, lakin kökümüzü kəsə bilmədilər. Ölən hər insanın yerinə 4 nəfər dünyaya gəldi. Beləcə insanlar artdı, çoxaldı”. Böyük gövdəsi olan bu çinar həmin qanlı döyüşləri özündə yaşadır, canlı şahid və tarixi abidə kimi qorunur. Çinar rayona gələn qonaqların maraqla baxdığı maddi-mədəniyyət nümunələrindəndir.
Bığır, Qaraməryam və Müsüslü kəndlərindəki naməlum türk əsgərlərinin məzarları 1918-ci ilin tarixi nişanəsi kimi qorunur. Mart qırğınları zamanı həlak olan azərbaycanlıların xatirəsinin əbədiləşdirilməsi üçün Göyçay şəhərində ucaldılan soyqırımı abidəsi də tarixin qan yaddaşını özündə əks etdirir.
Rayon tarix diyarşünaslıq muzeyində azərbaycanlıların soyqırımı və deportasiyası tarixini, 1918-ci ildə ölkəmizin müxtəlif bölgələrində, o cümlədən Göyçayda törədilən qanlı faciələri əks etdirən faktlardan ibarət daimi guşə yaradılmışdır.
Bölmənin digər xəbərləri
