GÜCLÜ DOLU VƏ LEYSAN AĞDAŞ RAYONUNA CİDDİ ZİYAN VURMUŞDUR
Ağdaş, 25 iyun (AZƏRTAC). İyunun 24-də axşam saatlarında başlanan dolu yarım saat ərzində Ağdaş şəhərinə, Ləki qəsəbəsinə, rayonun Qoşaqovaq, Şəkili, Korarx, Ərəbocağı kəndlərinə ciddi ziyan vurmuşdur.
Ağdaş rayon İcra hakimiyyəti başçısının birinci müavini, rayon fövqəladə hallar komissiyasının sədri Cavid Osmanov bildirmişdir ki, diametri 4-6 santimetr olan dolu dənələri evlərin dam örtüyünü, pəncərələrin şüşələrini sındırmış, meyvə-tərəvəz məhsullarını, biçilməmiş taxıl sahələrini məhv etmişdir. Dolunun ardınca yağan güclü leysan rayonda həyatı iflic etmişdir. İyunun 25-i səhər saat 6:00-dək davam edən leysan nəticəsində Ağdaş şəhərinin M.İsayev, S.Vurğun, Babək, 20 Yanvar küçələrini sel basmış, 300-ə yaxın evin zirzəmisinə və otaqlarına su dolmuşdur. Küçələrdə keçilməz su gölməçələri əmələ gəlmişdir. Şəhərin bəzi yerlərinə 1 metr hündürlükdə su yığılmışdır. Rayonun gigiyena və epidemiologiya mərkəzinin, baytarlıq idarəsinin, yanğından mühafizə hissəsinin, təhsil şöbəsinin, qaz istismar idarəsinin, bir neçə orta məktəbin və uşaq bağçasının binasına da su dolmuşdur.
Cavid Osmanovun sözlərinə görə, dolu və sel suları Ağdaş şəhərində, Qoşaqovaq və Şəkili kəndlərində 20-dən artıq evi uçurmuş və ya yararsız hala salmışdır. Qoşaqovaq kəndində 20 baş qoyun tələf olmuşdur. Rayonun şimal tərəfindən, Bozdağdan gələn sel suları 10-a yaxın kəndin həyətyanı sahələrinə dolmuş, əkin sahələri lil altında qalmışdır. Şəkili və Qoşaqovaq kəndlərinin ərazisindən keçən Yuxarı Şirvan kanalında daşqın təhlükəsi yaranmışdır. Təşvişə düşən əhalinin köçməməsi üçün Mingəçevir Su Anbarından Yuxarı Şirvan kanalına buraxılan suyun miqdarı azaldılmış və suyun bir hissəsi Türyançaya yönəldilmişdir. Hazırda ərazidə vəziyyət normaldır, kanalda suyun səviyyəsi aşağı enmişdir.
Rayonun yaşlı sakinlərinin sözlərinə görə, son 50 ildə Ağdaşa belə dolu və yağış düşməmişdir. Rayonda baş verən təbii fəlakətlə bağlı Fövqəladə Hallar Nazirliyinə rəsmi məlumat verilmişdir.
İdarə və təşkilatların kollektivləri, ağır texnika, suçəkən maşınlar və nasoslar təbii fəalakətin nəticələrinin aradan qaldırılmasına səfərbər olunmuşdur. Rayona elektrik verilişinin bərpası və telefon xətlərinin təmiri istiqamətində işlər davam etdirilir. Təbii fəlakət nəticəsində ziyan çəkmiş vətəndaşların müraciətlərinə baxılır, dəyən ziyanın məbləği hesablanır.
Bölmənin digər xəbərləri
