GÜCLÜ LEYSAN QAX RAYONUNUN MARSAN KƏNDİNƏ CİDDİ ZİYAN VURMUŞDUR
Qax, 30 may (AZƏRTAC). Mayın 29-dan 30-na keçən gecə Qax rayonu ərazisinə yağan güclü leysan yağışlar nəticəsində ərazidən keçən Qapıçay çayı daşaraq məcrasından çıxmış və sel suları rayonun Marsan kəndini basmışdır.
Rayon fövqəladə hallar komissiyasından bildirmişlər ki, daşqınlar nəticəsində Marsan kəndində mövcud 130 ev, fərdi təsərrüfatlar və əkin sahələri su altında qalmışdır. Təbii fəlakət nəticəsində xeyli miqdarda mal-qara, ev quşları tələf olmuş, şəxsi təsərrüfatlara ciddi ziyan dəymişdir. Yaxınlıqdakı Çüdülü kəndinin əkin sahələri də su altında qalmışdır. Sel suları, həmçinin Balakən-Yevlax magistral avtomobil yolunun ərazidən keçən hissəsində müvəqqəti çətinlik yaratmışdır.
Fəlakət baş verdikdən dərhal sonra rayonun aidiyyəti qurumları hadisə yerinə səfərbər olunmuşlar. Hazırda rayon fövqəladə hallar komissiyasının rəhbərliyi altında təbii fəlakətin nəticələrinin aradan qaldırılması istiqamətində iş aparılır. Görülmüş operativ tədbirlər nəticəsində artıq sel sularının tədricən çəkildiyi bildirilir.
Bölmənin digər xəbərləri
